ZORO-in Zo ID a siam

ZORO-in Zo ID a siam
ZORO-in Zo Indigenous indentity card a siam chu Mizoram Assembly speaker Lalbiakzama’n Nilaini khan a tlangzarh.
ZORO general secretary L Ramdinliana Renthlei sawi danin, Zo Indigenous indentity card hi UN thupuan – UN Declarations on the rights of Indigenous Peoples-in tualto hnamte dikna chanvo a pek, a bikin khawvel sawrkar ramri khamin a thendarh chu inkal pawhin an inlaichinna tinghet tur leh intanpui tawn a tul pawha intanpui a, sakhaw thil leh khawtlang thil, ei leh bar leh politics-ah an mi leh sate nen inpawh a, inpawlho theihna dikna chanvo an nei, a tih angin, kan dikna chanvo min siamsak kan zawmna atan a tangkai dawn a ni.
“He ID hian kan nihna a ti chiang dawn a. ID nei apiang chu khawvel ramri khamin a then Zofa – India, Burma leh Bangladesh a awmte zalen taka inkalpawh a ti awlsam thei anga, Zo Indigenous ID hian Zofate hi UNO hnuaia Indigenous Peoples Organisation (IPO) kan ni tih tichiangtu a ni a, indigenous peoples kan nih anga UNO-in chanvo min pek kan chan theih phah dawn a ni,” a ti.
Speaker chuan Zofate chu UNO-in ‘indigenous people’ ah min pawm tawh a. UNO-in indigenous people hi a ngaipawimawh hle, tih a sawi. UNO chuan hnam lian leh chak zawkten an awpbeh mek indigenous people-te chhanchhuah an nih theihnan UN Declaration chu kum 2007 khan a siam a. He thupuan hi tualto hnam chuan kan hman tangkai thiam a tul hle, tiin a sawi.
ZORO-in Zo Indigenous ID a siam tih hi UNO hriattir a ni dawn a. India sawrkar, Burma sawrkar leh Banngladesh sawrkar hriattrir a ni dawn bawk tih ZORO hruaitute chuan an sawi. India sawrkar lehkha pek hi Mizoram, Manipur, Assam leh Tripura sawrkar a copy pek a ni bawk dawn, tiin, Zofa zawng zawngin he ID hi siam vek turin an sawm tih an sawi a ni.