ZPM Candidate-te Val Upa Council hmaah intiam

Inthlanpui lo awm tura ZPM candidate turte’n Thawhlehni zan khan Val Upa Council (VUC) hmaah rinawmna thu an tiam.
Dawrpui Multipurpose Centre-ah hun an hmang a, ZPM thuthlung, election manifesto leh rinawmna thu an tiamte vuan tlat tur te, MPF kaihhruaina leh Election Commission Model Code of Conduct zawm tur tea intiamin, “ZPM candidate ka nih angin MLA-a thlantlin ka nih chuan ka chunga thuneitute thu chu engkimah ka zawm ang a, ka dinhmun atana an ruat apiang pawmin ka mawhphurna chu rinawm takin ka hlen zel ang,” an ti.
“Nomination ka file a, ka sum leh pai leh ro thil dang ka ziahna (Declaration of asset) ka thehluh copy chu kar khat chhungin Val Upa Council secretary hnenah ka thehlut ang a, hei hi hlemhletnaa inhnamhnawihna kawnga rinhlelh leh puh ka nih thulhah leh tul danga hman ka remti e,” tiin an tiam a, “Chhungkhat laina leh mi dangte, tute pawh duhsakna bik lakah ka inthiarfihlim ang,” ti te, “Pawl dang nena thawhho leh inzawm chungchangahte, nihna leh dinhmun chungchangahte, ZPM thuneitute thutlukna apiang ka pawm ang,” titein an intiam.
“Eng dinhmunah pawh ding ila, danin hamthatna min pek chhungah ka nung ang a, ka dinhmun avanga hamthatna siamchawp theih thil dang reng rengah ka inhnamhnawih lo ang,” an ti a, rinawmna thutiam hi hriat dan inang lo a awm palh a nih chuan Val Upa Council hrilhfiahna chu zawm turin an intiam bawk.
Thawhlehni zanah hian mi 31-in thu an tiam a, mi dang pakuate chu campaign leh tul dang avangin hun danga intiam tura tih an ni.