ZPM chu beih ngai loin an thusawi nen an inbei tawk – Vanlalzawma

ZPM chu beih ngai loin an
thusawi nen an inbei tawk
– Vanlalzawma
ZPM chu beih hran ngai loin an thu lo sawi tawhte nen an inbei tawk viau rih tih MNF vice president Vanlalzawma chuan a sawi.
Thawhlehni zana Aizawl South-I MNF Block office bearers leh MNF Gen. Hqrs. office bearers an inkawmnaah Vanlalzawma chuan MNF chu eptu ni chunga do leh beih hlawh ber an la ni reng a; hei hian party ngelnghet, ruhrel lian a nih zia a tichiang hle tih a sawi. “Congress chu beih hran an ngai loa; ZPM pawh beih hran ngai loin an thu lo sawi tawhte nen an inbei tawk viau rih a ni,” a ti.
MNF chu Pathian hruai party an ni a, inthlanah tlâk châng nei mah se, an tho chhuak leh thin tih an party vice president hian a sawi. Rorel lai ZPM-in kal ngaihna an hre loa, an tih tur awm ang ti loin, an tih loh tur ang zel an ti zawk tih sawiin, “An piangthar thuta an inthlak danglam a nih loh chuan, tho chhuak tur awm lo khawpin an la awm dawn,” a ti.
Village council /local council inthlan awm turah pawh Pathian leh mipui zarah hnehna an chan ngei a ring tih MNF hruaitu a sawi a. Rorel lai ZPM chu mipuiin an ning tan tawh a, an chungah rinna an nghat ngam tawh lo, tiin, chumi tichiangtu atan Sinlung Hills Council inthlanah khan ZPM sawrkar vanglai takin MNF chuan sawrkarna an siam tih a sawi a ni.