ZPM hi Pakistan ang chauh an ni – Er H Lalzirliana

ZPM hi Pakistan ang chauh an ni
– Er H Lalzirliana
ZPM sawrkar chu Pakistan ang chauh, chet ngaihna hre lo, mahni insawithiam chunga midangte demna zawnga chhuanlam siam reng an ni tih MNF MLA Er H Lalzirliana chuan a sawi.
Thawhtannia Mizo Hnam Run inkhawmah MNF adviser ni bawk Er H Lalzirliana chuan ZPM sawrkar chuan an tih ve loh tur nia an sawi an ti zel a, an danglamna langsar tak chu an hmel a ni tih a sawi.
“GST kan la minus (-) zat zat maite hi danglamna duhawm lo tak a ni. Support price, crop insurance, DAH dah tihte chu hlawhtlinna hmuh tur a awm lo. Thlaithar lei chungchangah chi 4 an thlan hi mipui rilru sukna mai a ni. ZPM sawrkar hi India leh Pakistan indonaa chet ngaihna hre lo, mahni insawithiam chunga midangte demna zawnga chhuanlam siam Pakistan ang chauh an ni,” a ti.
Mizoram kawngpui hmun tinah a chhiat em em vek avangin petrol leh diesel atanga chhiah nasa taka an tih pun, kawng siamna atana hman tur an tih chu engzat nge an hman tawh tih hriat a chakawm tih Er H Lalzirliana hian a sawi a. POL atanga chhiah lak tihsan chuan lirthei nei ve lote leh mirethei zawkte nasa takin a nghawng vek tih a sawi.
“Kum 20 chuang oil industry-a ka thawh chhungin India ram khawi hmunah mah hetiang taka chhiah tihsan hi ka la hre lo. Kan nitin mamawh man nasa takin a san phah a, miharsa zawk tan rum vawng vawng na tham a ni,” a ti.
Tumah dem loa hmasawna hna thawk mai thin chu MNF sawrkar kha a ni tih MNF hruaitu hian sawiin, “Infrastructure liantham zawng zawng deuhthaw MNF kutchhuak a ni tih mipuiin an hria. Kan nitin mamawh gas, buhfai, tui leh eng MNF sawrkarah kan hnianghnar thin. Hengte hi MNF kan danglamna a ni. Mahni mimal hamhaina ngaihtuah loin kan ram leh kan hnam tan nasa lehzualin ke kan pen zel ang,” a ti.