ZPM hotute thusawiin mi nuih a tiza chho zel – Zoramthanga

ZPM hotute thusawiin
mi nuih a tiza chho zel
– Zoramthanga
ZPM sawrkar chuan hniam lam panin, an thusawi pawhin mi nuih a tiza chho zel niin MNF hruaitu Zoramthanga chuan a sawi.
Kumin September 25-a Phunchawng Local Council by election-a MNF-in seat 5 awma seat 4 laa hnehna a chang chu Thawhtanni khan Mizo Hnam Runah an lawm a. MNF president Zoramthanga chuan lawmpuina thilpek a hlan a, thlantlinte chu theihtawp chhuaha Phunchawng khawtlang mipui leh ram tana thawk a, thleibik awm loa thahnemngai taka hna thawk turin a fuih.
“Mizo hnam leh ram himna aia an pumpuarna leh lan ropui tumna dah hmasa a, mahni ram neihchhun pawh dahkham hreh lo tu ZPM sawrkar hian hniam lam panin, an thusawi pawhin mi nuih a tiza chho zel a. MNF MLA Pu Lalrintluanga (L) seat kalsan tak hnawhkhahna tura by election inbuatsaih mekah pawh Dampa bial mipui sukthlek tur thui takin vawiina ZPM sawrkar kal dan, mipui hmangaihna aia anmahni inhaivurna lam hlir hmuh tur awm chuan a hril dawn tih MNF chuan a ring tlat a ni,” a ti.
“He ram hi kan ta, kan pi leh puten lu chhum ban chhum huama an lo sah zau, ‘thih leh ruam khatah, dam leh tlang khatah’ tia theihtawpa an lo humhim a nih angin, kan ram himna sadai thiat mektu ZPM sawrkar kalphung hi hnawl a nih thuaina turin MNF chuan theihtawp a chhuah zel dawn a ni,” a ti bawk.