ZPM-in AMC a puhna hi chhuitir ngei se – Lalrinenga Sailo

ZPM-in AMC a puhna hi chhuitir ngei se
– Lalrinenga Sailo
ZPM party-in tunhnaia MNF kaihhruai AMC a puhna hrang hrang chu thudik lo a ni tih mayor hlui Lalrinenga Sailo chuan a sawi a. Investigating agency enge emaw ber chhui tir ngei se tih chu an duh dan a ni tih a sawi.
ZPM party-in thudik lo hmanga AMC an beihna thenkhat chu sawifiah ve a ngai tih mayor kalchhuak tur Lalrinenga Sailo hian a sawi a. “AMC kalta diklo taka puhna leh mipui rilru hruaikawi tumna hi tunhma pawha an lo tih fo thin a nih avangin Aizawl mipui hian thudik hria se ka duh a, thudik hailang turin ZPM sawrkar hian ACB emaw investigating agency dang tu pawh chhuitir ngei se tih hi kan duhdan a ni. Corruption-ah kan fihlim a ni tih pawh hi kan sawi chiang duh,” a ti.
Bawlhhlawh phur truck hralh chungchangah state sawrkarin AMC rawn hmasa loin lirthei tam tham tak SIPMIU kaltlangin AMC hnenah a pe a, enkawlna senso leh driver leh handyman-te hlawh tur a tel bawk si loa, AMC dinhmun atang chuan a senso a tam tham em avangin enkawl reng theih a ni loa, mimal hnenah loan angin pekchhuah a ni a, tha takin hna an thawk zui a, loan pawh a pung nen hmuh let vek a ni tawh tih a sawi.
Outsource a nih dawn hian dan ang takin Transport department-ah MVI-in evaluation certificate an siam thlap tih sawiin, Board of Corporators thukhawmin a remtihna anga kalpui a nih avangin party mal inmawhpuhna chi a ni lo tih a sawi a ni.
Tuirial-a bawlhhlawh chhunkhawm senghawina atana mimal excavator (JCB) hman chungchangah SIPMIU-in khawl thar a pek awm reng si hmang duh lo anga sawi pawh thudik chanve a ni tih mayor kalchhuak tur hian a sawi. “SIPMIU-in AMC kuta SWMC a hlan khan enkawl zuina tur sum engmah a hlan tel loa. Excavator a hlan pawh hnathawk atan a fit tawk loh avangin senso tam taka repair fo a nih avangin mimal hnenah outsource a ni ta a. CAG Audit Report-in khawl nei chung sia exacavator dang hman chungchang a comment pawh hi a tih awm tak a ni a. Khawl la thar tak hman tlak si loh a ni tih an hriat loh vang a ni,” a ti.
AMC Sports Complex Bawngkawn ami chu local council leh NGO-te remtihnaa PPP mode-a agreement siam a ni a, AMC-in fund a hmuh ang zela hna thawh tur a ni tih a sawi. A hman man atangin AMC-in 60% leh Bawngkawn khawtlangin 40% chang tura inrem a ni a, a enkawlna senso erawh AMC tum tur niin, Management Committee hi Bawngkawn Local Council hnuaia din a ni a, AMC represent mi pahnih an tel ve tih a sawi a ni.
A tira social media lama thlalak an tarlan kha AMC-in a kuta a lak hma ami a ni, tiin, Youtuber hire-a Bawngkawn West Local Council hruaituten an tih lan lehah pawh DPR leh detailed estimate sawichiang duh loin rinthu nen mipui rilru hruaikawi tumin an sawi chiam niin a sawi.
“Hna hi kum tam tak chhungin fund tlachawp awm dan azira thawh an nih avangin lo lang hlui deuh awmin fencing post leh fencing net a lo bo nual tawh a. A thar hlima engineer-ten an approve ang ni thei tawh lo thil thenkhat a awm. Hnathawh danah hian eirukna leh dik lo taka thawh a awm lo tih finfiah kan ngam a, sawrkar hian chhuichiangin Bawngkawn khawtlang leh AMC nen contractor-te koin enho vek kan cho a, kan duh bawk a ni,” a ti.
Advertisement chhuah loa hna la thina AMC puhna pawh thu belhchian dawl lo niin Lalrinenga Sailo hian a sawi a. AMC term hmasa ber, Congress leh ZNP sawrkarin hna hrang hrang an lo lak tawh chu MNF sawrkar chuan mi 40 chuang a nghetin a dah zawk a. Tun dinhmuna Tuirial bawlhlawh paihna hmuna thawkte leh AMC office-a casual worker-a thawkte hi an kal ni chauh a hlawh la, minimum wages anga hlawh pek an ni a, regular-a thawk an awm lo tih a sawi.
“Staff-te indaih lohna avangin casual worker-te hi temporary-a chhawr an ni a. Tuna AMC regular employee zingah MNF AMC sawrkar chhungin pakhat mah lak an awm lo a. Loh theih loh avanga geologist consultant, fixed pay-a chhawr sa, contract-a leh tumna pawh MZP duhdana thulh a ni zawk a ni,” a ti.