ZPM-in MLA 5-te dan bawhchhiat thu an puang – MNF

ZPM-in an party behchhan independent MLA pangaten dan an bawhchhia chu anmahni ngeiin an rawn puang chu a lawmawm tih MNF party chuan an sawi.
MNF Gen. Hqrs. thuchhuak chuan, ZPM-in MLA 5-te danin a phut anga MLA atanga banna thehlut an ni, tia thuthar thehdarhtute an kawmnaa an sawi chuan, independent MLA-5 te hi dan kalha khawsa, banna thehluh ngai an nih zia a tichiang a. Thudik an rawn puangzar hi lawmawm an ti hle tih a sawi.
Hetihrualin, dan phut anga ban ngai si, dan hmanga Pu Lalduhoma ban a nih hnua an ban ve mai loh chhan zawtin, ‘Ban tura nawr zui ngai loa ban nachang hre pha chin tura beisei an nih lai a, independent MLA ni chunga ZPM party office-a kal reng, an party thiltihna zawng zawnga phusa, MLA hamthatna zawng zawng an hmuh zawh vek hnu, model code of conduct-in a phuar tak hnua bang ta chauh an ni hian, dan kalha hamthatna dawngtu nih an hreh loh zia a pholang chiang hle,’ a ti.
Kum 2018-a pawl indin chawp, party politics kan chhiatpui thu aupui leh party ding tawh sa te nasa taka sawichhiain, an ni chu party an ni ve loa, mipui pawl movement an nih an sawi thin awihtuten an candidate 7 an thlangtling a. Party an nih ve loh avanga duh taka thlangtlingtute hriat lohin Election Commission-a inziaklut turin dilna an lo thehlut leh si tih MNF hian sawiin, ‘Kum 2019-ah, mipui pawl an nih avanga duh taka thlangtute uire sanin, India Danpui 10th Schedule kalhin political party an nih san ta a ni,’ a ti.
ZPM general secretary sawi “…anmahni leh party tan pawha him zawk nan official takin ZMP candidate ni turin banna an thehlut…” a tih chu thil dik, independent MLA ni chunga ZPM candidate nih chu thil rem lo, nomination-a tlang lo tur an nih vang zawka bang an nih thu sawi tel se, dan kalha ZPM party-a inhmang char char an nihna pawh a pholan lehzual an ring tih MNF hian an sawi.
‘A ruka political party nih tum ran chungin mipui rilru hneh nan party politics an sawichhia a, inlawmluh, unit din leh a dangte sawiselin an au chiam a. An sawisel ngei chu an insawi loh ang zelin ZPM hian an luhchilh a, a uar ber berah an tang zui ta a. An manifesto anga awm tura independent MLA-te an beisei laiin, an thuneitu sang ber Val Upa Council thu engahmah ngai loin, MLA hlawhsang la in lirthei thar an lei a, inti lal takin designation plate pawh an kalna apiang deuhthawah an tar a. Heng zawng zawng hi an kalphung thar zawrh a nih avangin, mipuiin an lakah rinhlelhna neiin, an bumna thanga lo awk tawhte pawh an talchhuak mek zel,’ thuchhuah hian a ti.