ZPM ministry-ah sawrkar hnathawkte an phur thar – B Lalchhanzova

ZPM ministry-ah sawrkar hnathawkte an phur thar
– B Lalchhanzova
ZPM ministry a pian hnu ah minister-ten huaisen taka hma an hruai vangin sawrkar hnathawkte an phur thar hle tih minister B Lalchhanzova chuan a sawi.
Thawhtannia an party office-a inkhawmah ZPM hruaitu B Lalchhanzova chuan, sawrkar hnathawkten ram hmangaihtu tak tak ministry hmu tawh lo tura an inngaih laiin, Pu Lalduhoma kaihhruai ZPM ministry a piang chu an phur thar a, hnathawh turin a hmuak a, anmahni tul leh pawimawh ti hman lo khawpin thahnem an ngai tih a sawi.
“Induhsakna uchuak leh sawrkar hnathawkte kut phuarsak a bo a, dan hnuaiah thil a nih dan turin a kal chho mek. Heng hi kan minister-ten huaisen taka hma an hruai vang nia sawrkar hnathawkten an sawi hi thil lawmawm tak a ni,” a ti.
Zofa tlang hrang hranga chengten ZPM ministry an inti neitu a, thalai hna zawng mekte an ngaih a tha a, ZPM party ah hmeichhiaten an thawhhlawk a, kum upate an tlangnel a, he party tluka kuthnathawktute ngaihsak tak tak an la awm lo tih hriain kuthnathawktute pawhin ZPM lam an hawi zel tawh niin a sawi bawk.
Congress leh MNF chu ZPM party pian hma zawng chuan ui leh kel thlun pawlh ang maiin an inhal a, chu chuan politics tuinu hringchhuakin mipui min ti chiai hle thin tih B Lalchhanzova hian a sawi. ZPM pian hnu ah party pahnih inbakkaih thawm a reh tan a, an dinhmun an hrechiang nge, AMC inthlan turah pawh seat insema thawhho tumin an inbe mek tih thawm a awm ta zel tih a sawi bawk.
Kumin VC/LC inthlanah Congress leh MNF-in ZPM party nasa takin an beihrawn nia sawiin, “Hei hian party lian pahnihten inrintawkna an tlakchham zia a tichiang a, mipuiin heti taka party lian pahnih an teirei peih lo leh an zam hma lutuk kha mak an ti hle. Hei hian ram an lo hruai tawh dan leh an hnathawhten inrintawkna a pe lo tih a chiang a, hnuhma pawr an ngah em avangin ZPM sawrkar ta hian a vau zam niin a lang,” a ti.