ZPM MLA rualin kawng siam vil dawnNHIDCL-in Railways lam puh ve leh

ZPM Legislature Party ruahmanna in Kawnpui – Sairang inkar kawng chhia thawmthat mek chu nitin minister/MLA atangin mi pahnihin an invil chhawk dawn a. Minister-ten kawng siam mek an tlawhnaah NHIDCL chuan kawng tichhe nasa bertu ah Railways kawng sial an puh ve leh thung.

ZPM Legislature Party (ZLP) hi Inrinnni zan khan PWD minister Vanlalhlana kaihhruaiin an thukhawm a. Kawnpui leh Sairang inkar NH-6 kawngpui chhia leh chumi nghawnga lirthei leh driver tangkhangte harsatna sutkian dan an ngaihtuah. Lirthei tangkhangte a rang thei ang bera an chhuah theihna turin ruahmanna siam zel nise, Home minister-in tih tur tul lo ngaihtuahin police pawh thahnem zawk tirh luh nise, an ti.
Lirthei tangkhang enkawltuten ei leh in tur an tlachham tawh a, a rang thei ang bera ngaihven nghal tura tih nii, Kolasib district bawrhsap kaihhruaia tangkhangte ei leh in buaipuina atan cheng nuai thum pek chhuah chu Pathianni - July 27 atanga sem tan a ni a. Kolasib bialtu MLA, deputy speaker Lalfamkima chu Kolasib bial lam vil zui tura tih niin, Sairang lam hnaiha tangkhangte ei leh in tur pek chu Dr Lorrain Lalpekliana Chinzah leh Jeje Lalpekhlua-ten an enpui a ni.
Kawng siamthatna atan lung (boulder) mamawhna a sang hle a, Mizoram pumah a lakkhawm theih dan kawng dap nise, tiin an rel a. Kawng chhiatna hmunah hian PWD thuneitu sang chinin awmchilh se an ti a, Silchar lam atang lung chang tha lakluh nise an ti bawk. 
Pathianni zing khan PWD minister inah PWD hotu liante kohkhawm an ni a, an hnathawh dan tura Mizoram sawrkar duh dan hrilhfiah an ni. Hetah hian minister pathum - Dr Vanlalthlana, F Rodingliana, Prof Lalnilawma bakah adviser to chief minister pathum - Lalmuanpuia Punte, TBC Lalvenchhunga leh Er H Ginzalala-ten PWD minister an tawiawm.
He kawngpui changtu NHIDCL dawr chhunzawm reng niin, chak zawka hna an thawh theih dan turah ruahmanna siampui zel an ni a; Mizoram kawngpui pawimawh a nih avangin chief minister Lalduhoma duh danin sawrkar sum awm ang angin harsatna awm mek chinfel dan ngaihtuah chhunzawm zel a ni tih sawi a ni.
Kawngpui siam hi nitin minister leh MLA pahnih talin tlawh ziah turin an rel a. NHIDCL leh PWD hnathawh hi a hmunah endikin an vil thin ang, tiin an rel.
‘Mizoram chak lakna kawngpui siam hna a kal chak thei lo leh chumi avanga mipui tawrhna thleng mek hi pawi kan ti a. NHIDCL-in rintlak leh tha taka an siam hi ZPM Legislature Party duh dan a ni a. Mipui tana harsatna liantham a thlen tawh lohna turin PWD pawhin a tul tulah an pui thin ang,’ an thuchhuak chuan a ti.
ZLP he kawngpui pawimawh avanga harsatna a taka vil turin Crisis Management Committee a din a. Kawng siamna atan hian minister F. Rodingliana’n a truck pathum leh vibratory roller a thawh a, adviser to CM Er H Ginzalala’n excavator pathum thawhin, Assemby speaker Lalbiakzama’n veivahna tur POL a thawh bawk.
ZLP thukhawm thuchhuak angin Pathianni khan minister pahnih - Dr Vanlalthlana leh Prof Lalnilawma ten kawng siam hnathawh kal mek hi a hmunah an vil a, Mualkhangah NHIDCL leh PWD hotute nen an inkawm a, NHIDCL hotute chuan tun dinhmuna kawng tichhe nasa ber tu pakhat chu Railway kawng sialin lei an laih chhiat nasat vang a ni tih an lo sawi chu minister-te hian a tul anga an lo enzui tur thu an sawi a ni.