ZPM nen sawrkar turin kan inbuatsaih – Lal Thanzara

ZPM nen sawrkar turin kan inbuatsaih
– Lal Thanzara
Lai Autonomous District Council-ah rokhawlhna dang a awm a nih loh chuan ZPM nen sawrkarna siam turin an inbuatsaih mek tih Congress hruaitu Lal Thanzara chuan a sawi.
Zirtawpnia Congress Bhavan-a inkhawmah MPCC president Lal Thanzara chuan, LADC inthlanah Congress ticket-a ding 14 zingah 7-in hlawhtlinna an chang thei chu Pathian kaihhruaina a ni, tiin, an hlawhtlinnaah hian an MLA neih chhun Pu C Ngunlianchunga inpekna an chhuang takzet tih a sawi.
Kum 2026-ah Congress party-in thahnemngai lehzuala thawh an tum dawn tih sawiin, “Kum tharah AMC inthlan kan hmabak a, candidate kan nei kim thawkhat tawh. January 12 office hawn ni-ah kan candidate turte puan hman kan beisei,” a ti.
Mizo ringtu, kohhran mi kan nih anga politics kan khel a nih chuan, Congress-ah kan awm mai tur a ni, tih Lal Thanzara hian a sawi a. BJP chu chanchintha hril min khaptute an ni a, sakhaw zalenna nuaibo duhtute an ni tih a sawi.
“Chumite chu MNF-in an thawhpui a, ZPM pawhin a langin thawhpui chiah lo mah se, MLA inthlanah khan BJP sum hmangin an campaign a, kan MP pawh BJP inhmuhkhawmnaah a phusa hle tih kan hria. An ni hian Mizo Kristian mipui zah lo se, hei ai hian an inhnimphum zual ang. Chuvangin, Mizo Kristiante chu Congress-ah kan lut mai tur a ni,” a ti.