ZPM policy & manifesto in belhchian dawl ber – ZPM Research Wing

ZPM chu research based policy nei awmchhun a nih avangin party dang policy leh manifesto aiin belhchian a dawl zawk tih ZPM Research Wing chuan an sawi.
ZPM Research Wing chairman Prof H Lalramnghinglova leh secretary Dr KC Lalmalsawmzauva te chuan Research Wing member-te hi university leh college-a zirtirtu, sumdawng leh entrepreneur bakah sawrkar hnathawk hlui, an thawh laia kawng hrang hranga ram tana rualawt em em thin, sawrkar kalphungin a zir loh avanga tihlawhtling thei lo, ZPM-a beiseina nei kalkhawmte an ni ber tih an sawi.
Research Wing an din chhan ber chu, zirchianna (research-base) hmanga Zoram mipui kaihhruai leh hmasawnna thlen a ni, tiin, rinthua kum 36 kan inkaihhruai hnu leh, manifesto pawh vote zawn nan an inziahthat siak mai mai avangin, kan chhehvel state ten min tlan pel duai duai tih an sawi a ni.
“Chutiang dinhmun atanga Mizoram kaichhuak tur leh ‘rinthu’ ngawt ni lo, zirchianna hmanga mipui kaihhruai kan nih theih nan tih theih kan nei ve dah lo maw, tiin ZPM kan thlawp a. ZPM policy buatsaih kawngah pawh a theih chin chin research based-a kalpui a nih theih nan tha kan thawh a, kan hun leh tha, thiamna tlem mah se, party dang policy leh manifesto ai chuan belhchian dawl zawk turah kan ngai,” an ti.
Policy-ah hian thenkhat chu tih hlawhtlin nghal mai theih a awm rualin, thenkhat chu hun duh rei tur chi a awm nual a; a then chu sawrkar hnua enzui ngai zelte pawh a awm tih an sawi.