ZPM president insawi- fiahna VUC-in pawm lo

On Jun 3, 2026 0 0

ZPM president-in taksa lamah harsatna a tawh avangin an party leader, chief minister ni mek hnenah charge a hlan a, hemi chungchang a sawifiahna chu VUC-in an pawm lo.
ZPM president hian April ni 22 khan an party leader kutah president charge a hlan a, Val Upa Council (VUC) te’n hemi chungchanga an ngaihdan ziaka an thlen chu April ni 27-a a lo dawn thu sawiin an president hian thil awmzia a sawifiah a, mahse VUC-in chu chu an pawm lo.
VUC hian president chhanna hi May ni 11-ah an dawng a, May ni 18-ah an ngaihtuah. “Kan party tana tha ber tura ka ngaih hi min zahsak a, min pawmpui turin ka ngen a che u,” tiin president-in ngen mah se VUC chuan “ZPM party president-in dan ding lai Article 21 (1), 19(2)(b) leh Manifesto 1(4) te bawhchhiaa chief minister kuta charge a hlan hi tha kan ti lova, hetiang hi thleng tawh lo se kan ti,” tiin thu an dah a ni.
An party dan Article 21 chungchangah hian an ngaihdan a inang lo a, president-in “I lehkhaa i rawn tarlan Danpui 21-na ngei pawh hian EOB nihna chelh kawp thei lo tura a tih zingah hian Chief Minister/Legislature Party Leader hi a tel ve lo va, Minister-te chauh hi EOB ni kawp thei lo a tihte chu an ni. Chief Minister leh Minister-te hi mi hrang, nihna leh dinhmun inang lo an ni a. Mi tu mahin Minister-te hi Chief Minister kan ti ngai hek lo,” tia a sawi chu, May ni 18-a VUC thukhawm chuan, “Danpui article 21(1)-a Minister tih hi Council of Ministers te sawina a ni a. Chief Minister pawh a huam tel a ni e kan ti,” tiin an ziak.
An dan Article 21(1)-ah hian “Minister leh Party Elected Office Bearer nihna chelh kawp theih a ni lo ang,” tiin an ziak a ni.
EOB hi Elected Office Bearer tihna a ni a, ZPM-ah an president, vice president leh treasurer te chuu EOB an ni. Chung nihna chu minister ni chunga chelh loh tur tih dan an nei a, mahse president-in chief minister chu minister a ni lo, chief minister leh minister chu mi hrang an ni a tih laiin VUC lamin minister hi council of ministers sawina a nih avangin chief minister a huam tih ngaihdan an nei ve thung.