Tunlai chu CBI hnena general consent pek leh pek lohin buaipui a hlawh a, a kaihhnawih thil a kangkai chho zel bawk a. Niminah MNF Gen Hqrs Legal Board lamin press conference neiin, general consent chungchang sawi ri vuai chungin thildang an rawn kheuh hawng leh a. MNF legal board ten an rawn auchhuahpui thute hi, a sawifiahna emaw, a chhanna emaw mipui lamin an lo chang leh thuap dawn tih a lang reng mai.
Sawifiah ngai point lian zualte chu – 1. ZPM sorkar leh Chief Minister hian an huat zawngte chauh CBI chhuitir a, an lamtang leh an mi leh sate erawh hum zel an tum. 2. ZPM sorkar hian eirukna, sum hman dik lohna leh pawikhawihna lian thamte CBI hmanga do an tum tak tak a nih chuan Home Dept. hnuaia Open Tender lem tih chhuah dan te chhuitir se. 3. Lok Sabha MP-in Mizorama Grape chingtute chanai tur liau liau, Market Intervention Scheme (MIS) hnuaia 35% (Cheng nuai 100 chuang zet) a lo fanghma no ei thu, amah ngei pawhin ZPM party Office-a a lo puan chhuah tawh te chhuitir se. 4. Buhfai Supply-tu tur thlan kawngah dan kalha a chhang hniam ber ni lo, an duhsak zawng an pek avanga mipui sum tam tak luangral tur chungchang te, Work Supervisor invuaha party worker te hnena dan kalha Contract hna pek chungchangte ZPM sorkar hian CBI te chhuitir tur hian ngen tel nghal se…
Tunhma atang tawhin inpuhmawhna thil hi political party-te inbeihna deuh ber a ni ti ila, kan sawi sual vak awm love. Thil dik lo tia inpuhna thawm hi mipuite hian kan political party-te atanga kan hriat tam ber a ni a. A lehlamin an han puh a, a lehlamin an han sawifiah a, thu dengkhawng tak takte pawh an hmang thin. Chu chu mipui hian kan lo buk kual vel mai mai thin a, a tawpah ‘eng ber nge dik?’ tih hi hriatzui a ni tawh mang lo thin. Chu chu Zoram politics chu ni deuh berin a lang.
Tuna political party ten an buaipui mek ang hi thil tha tak, dikna hailanna tura thil pawimawh tak a ni, opposition party ten roll an play tur pawimawh tak a ni, hetiang hi a kal zel pawh a pawimawh, inkhalh ngilna tur a ni. Chutih rualin, ram leh hnam hmasawnna policy lam hawia inhnialna ‘debate’ nei turte hian incho kual ve thin tho se, eng vangin nge Mizoram hi ei leh bara kan la intodelh theih reng reng loh? tih lam hawi te hi inhnialfung atan hmang thin se, kan sawtpui viau zawkin a rinawm.
ZPM sawrkar sawifiah turte…
Get real time updates directly on you device, subscribe now.
Next Post