ZPM thlak turin MNF aiin min duh – Congress thupuangtu
ZPM thlak turin MNF aiin min duh
– Congress thupuangtu
ZPM sawrkar thlak turin mipuiin MNF aiin Congress an duh zawk tih an party thupuangtu Dr Lallianchhunga chuan a sawi.
Thawhtannia Congress Bhavan-a inkhawmah MPCC thupuangtu chuan, Mizorama sawrkarna siam tawh zingah ZPM sawrkar chu mipuiin an nin hma ber a ni tih a sawi a. 2028 inthlanpuia ZPM thlak tura mipuiin MNF aia Congress an duh zawk chhan chu, MNF a sawrkar leh chuan sawrkar hnathawkten a hun takah hlawh an la thei lo leh anga, Mizo nationalism aiin Kamrul-a contract thawh tur an buaipui leh zawk anga, politics hmanga Hindu sakhua sawhngheh tumtu Central BJP tha ti chak turin hma an la leh dawn tih mipuiin an hria tih a sawi.
Kum 2018- 2023 chhunga MNF sawrkarin an intiamna tihhlawhtlin an nei lo, tiin, “Nuai thum min tiam a, traffic jam awm lohna khawpui min tiam a, kawng chhawng min tiam bawk. Hengte hi tihhlawhtlin an nei lo. Kum 2028 inthlanpui kan hmachhawn turah MNF hian inzawrhna tur engmah an nei tawh lo,” a ti.
Congress party-in kum 2008- 2018 chhung khan sawrkar rintlak, mipui innghah ngamna a lo siam tawh tih a sawi a. MNF leh ZPM sawrkar nena tehfung hrang hrang hmanga khaikhin pawhin Congress sawrkar chu a tha bik larh niin a sawi.
Healthcare-ah ringawt pawh ZPM sawrkarin damlo sing 5 chuang bill a pek tawh laiin, Congress hunlai chuan mi nuai chuangin an chhawr a; sawrkara hlawh la thinte MR bill chhiar tel loin, sawrkar hnathawk awm lohna chhungkaw tlemtein MUHCS chu an chhawr tih a sawi. Congress sawrkar se chuan private hospital-te pawhin ngaihngam takin sawrkar healthcare scheme chu an zawm ngei dawn tih a sawi a ni.
ZPM flagship programme – Bana Kaih hnuaia loan pek tur chu bank lamin an ring zo loa, ZPM sawrkar a tlak hnuah sawrkar tharin a chhunzawm sak duh zel dawn em, tih an ngaihtuah tih Dr Lallianchhunga hian a sawi. “Bana kaih loan atan bank-in a hranin sum a nei lo. Housing loan pek chhuah thlengin a nghawng, tih sawi awm hi a pawi,” a ti.
Chief minister Lalduhoma chu hun kal tawha ram hruaitute haw tur zawnga thusawi a ching chu a tha lo takzet tih MPCC thupuangtu hian a sawi bawk.