ZPM tun hun leh nakin hun tur

K. Hmingthankaia

Kha leh chen kha ZPM party leh an sawrkar fakna kan lo sawi zing ta bawk a, kan han fak nasa leh lutuk thin khan ek pawh nei ve lo ang mai dawn dawn khawp te khan kan han chhuah thin kha a niah. Chu’ngte avang te pawh chu a ni tel ve thei tho bawk mahna, kum 2026 AMC inthlanah chuan hneh takin ZPM chu an lo chak ta bawk a, tunah chuan, fimkhur thu hlaa lo inven lawkna tur warning angrengin ZPM negative lam leh eng eng emaw sawi ve tawh thung ang aw.
Tunhmaa party pahnih Congress leh MNF insawrkar chhawkte khawsak dan mipuiin kan ning lutuk leh, politic tuinu leh party ruihchilhna thlarauvin a tihbuai ve loh, khua leh tui tha mi rilru fimte mangang leh beidawngte rum ri leh an tawngtaina avanga ZPM party hi lo piang a ni tih hi sawi nawn leh thin ang. Kan ram leh hnam awm dan avanga mangang leh beidawngte khan hmun hran hran, mahni awmhmun theuh atangin Pathian kan auva, kan theih dan danin kan theihna hmun hmunah kan au chhuak bawk a nih kha. Chutiang mi, a hmaa inhresa lo leh inthurualsa pawh ni lote kha khawimaw lai laiah te kan kalkhawm thin a nih kha. Chutichuan, a tawi zawngin, Pathian remruatin ZPM hi a lo piang ta a ni tih hi thangthar zelte pawhin an la rawn hriat atan ka’n sawi nawn leh ngat a nih hi.
Mahse, ZPM pawh hi thlarau thianghlim leh vantirhkoh awmkhawm an ni bik lova, tun atana a hmaa mite aia tha deuh hret khawvel political party pakhat ve mai kha an ni. Chuvangin, engtik hunah emaw chuan tuna mite fak rawn leh inthlana chak pur pur an nih ang hi chu an ni reng bik dawn lo. Lehlam pawlin theihpatawpin tan an la ve reng dawn a, an chhiatna turin theihtawp an chhuah ve reng dawn a ni. Chu chu a mak lo, khawvel politic awmdan a ni. Mahse, ZPM hi chu an chesual hle a nih loh chuan tun dinhmunah chuan chuti maia han tlahniam duai thut thei tur chuan an la lang hrih lo a ni. Mahse, zawi zawi chuan an la tlahniam ve ngei ang. Chuvangin, an thlamuang sual ang tih a hlauhawm khawp mai.
Political party tha tak anga daih rei, mipui fak leh duh rawn, inthlana chak leh sawrkarna siam rei thei nih an duh chuan tun atang hian an fimkhur hle a ngai a ni.
Party hian hniam lam leh tlak chhiat theihna tam tak an neih zinga pakhat chu, chhung lam atangin a nih duh theih tho thin avang hian, ZPM pawh hian an chhung lam hi an bih chian a ngai hle ang. Ka rin dan leh hmuh dana an tlakhniam leh an chhiat theihna bul intanna tur pakhat ni ve thei tho tur chu, pawnlam atanga beihna ringawt ni lovin, anmahni chhunglam atanga intan a ni ve mai ang tih a hlauhawm khawp mai.
Sawi tawh angin khawvel political party pakhat ve tho an ni a, an member-te pawh mihring ve tho, mamawh leh duh nei, beisei nei ve vek tho, mahni theuh chu hmasawn leh changkan duh ve vek tho, mihring dang ang bawka duhamna leh hmasialna nei ve vek tho an ni a, tin, lalna leh thu neitu nihna, ropuina leh chungnun duh ve vek tho an ni. Mahse, an la tharlam deuh avangin anmahni thlangtu mipui hmai an la zah avang leh, an la inthunun theih hram hram avangin heti lam hi chu tunah chuan chuti takin an la tilang lutuk lo niin a lang a. Mahse, hei tho hi an la buaina hmasa tur chu a la ni ve thei tho a ni.
Chuvangin, an party hotute leh MLA leh Ministerte hian tun atang hian an party chhungkua leh an memberte, an unit chhungkuate hi an ngaihven thiam a ngai khawp ang. Ka lo hriat thawi ve deuh dan phei chuan tunah pawh hian khawimaw lai laiah chuan ri deuh neuh neuh chu a awm tan deuh tawh hial lo maw?
Chuvangin, tun atang hian an party chhung boruak hi an en ngun loh chuan ZPM party pawh hian daih rei lovin, hma takah an chhe leh mai ang tih a hlauhawm em em a ni. Anmahni aia tha midang an lo lan leh tawh lawk loh phei chuan, tunhmaa kan duh tawh lohte bawk kha an lo lang leh dawn si a, duhthlan tur hre lovin mipui kan mangang leh dawn a ni.
Sawrkar ta na na na chuan nitin thlatin kumtin ram leh mipui hmasawn nan eng eng emaw an tih a ngai reng a. Chutiang hnathawk tur chuan mihring tute emaw an ngai thin a ni. Chutiang hna thawk tur chuan party zawng zawngin an mi leh sate an duhsak thin. Chu chu a mak lo. Political party kalphung, mahni party sawhngheh nana party zawng zawngin an tih dan a ni. Mahse, chu chu fimkhur taka an kalpui loh leh an tih nasat lutuk thin avangin an chhiatpui leh thei thova, zalen lutuka thei sem taka an sem thin avangin mipui mit a kham a, an mi leh sa zingah chang ve manglo leh chang tlem bik an awm lo thei si lova, chu’ng mite chu an lungawi lova, an chhiat phah leh tho bawk thin a ni.
Chuvangin, ZPM pawh hi political party ve tho in nih avang hian, in party sawhngheh nan leh in inlungrual tlan reng theih nan in mi leh sate hi uluk takin ngaihven ula, fimkhur tak leh felfai taka in tih a, mipui mit tikham lo zawng leh in intiam ang ngeia in hna a that phawt chuan, lo sawisel theih tehchiam pawh a ni bik lo ang. Political party kalphung kha a ni tlat si a. Sawi tawh angin hna chu a thawktu an awm a ngai si a.
Mahse, in party chhungah inzirtirna leh inthununna tha tak in neih hmasak a ngai ang. In fimkhur lohva in tih leh lutuk emaw, in tih zalen leh lutuk chuan in chhiat phah ve thei tho dawn a ni. A awm tawk chu in hre mai ang chu. Pawimawh em em chu duhsak bik leh thlauhthlak bik awm thin hi party chhiatna bul a ni. Tin, party mite duhsakna awm chi leh chi loh thliar thiam a ngai khawp bawk a ni. Thil pawimawh lutuk chu, party chhungkuaa buaina lo inmun tanna chu duhsak bik neih vangte, party hruaitute leh MLA leh Minister ten tute emaw kuah ngheh bik tlat an neih thin avang leh, tute emaw thlauhthlak luih tlat an neih thin vang a ni.Tin, MLA bial khat chhungah hian Veng duhsak bik leh thlauhthlak deuh bik anga inngai Veng an awm em? tih pawh hi ngaihtuah thin a tha khawp mai.
Chunglam atanga a nuam chin leh thil ti thei inti taka engmah ngaihtuah thuk tha duh lem lova thawveng taka an khawsak lai hian, an chhunglamah nget a lo awm tan ru reng thin a, tute emaw chu rilru na tak leh vui takin an lo awm thin a, chutiang atang chuan party leh sawrkar chhiatna pakhat chu a lo intan ta thin a ni. Hetiang hi ZPM party pawhin in la hmachhawn tur leh, tunah pawh in tawn tan mek pawh a ni tawh hial mai thei a nia aw. Tunah pawh hian Aizawl chhung khawimaw lai bial hi chu tuna an awm dan anga an kal zel chuan, MLA inthlan leh huna candidate lama buai deuh nak tur bial te hi an awm ang tih a hlauhawm e. Mahse, chu pawh chu insiam thatna hun a la awm e.
Khitiang zawng zawng baka thil pawimawh dang pakhat chu a ngiala nganin ka sawi ang. ZPM party leh ZPM sawrkar hi mipui siam dik tak, mipui ta dik tak a nih avang hian party hruaitute leh sawrkara mi pawimawh, MLA leh Ministerte pawh hian mipui lakah awm dan in thiam a ngai bik hle a ni. Sawi tawh angin he party leh sawrkar lo pian theih nana mahni phak tawk theuhva theihtawp lo chhuahtute hi vengtinah mi tam tak an awm tih leh, vawiin thenga ZPM hi a kal sual palh ang tih hlau leh, kan duhloh hnu te khan an lehthal leh mai ang tih hlau em ema ZPM tana thahnem ngai taka theihtawp chhuah rengtute an awm reng tihte hi hre reng ang che u. Chu’ng mite chuan a ruk takin ZPM hi an inti neitu em em a ni tihte hi hria ula. Mahse, nangni chuan chu’ng mite chu in lo hre tha duh mang miah lovin, in party hruaitute leh in unit hruaitute thleng hian an lo huphurh lawk niawm tak hian an lo be tha duh lo lehnghal em? Party hruaitute leh MLA leh Minister-te nen han inhmuh nikhua te hian engemawtia biak ve te pawh an phut ru ve deuh maithei a nia aw. Chutiang avanga vui ru deuh chu an lo awm nual tawh maithei a nia aw. Chutiang chu in insiam that vat loh chuan party insawhngheh zelna tura thil pawimawh tak a la ni ang.
Tin, thil pawimawh lutuk pakhat, a tirte atanga ZPM tana lo beitute kalkana, hmanni lawk, a nuam china lo lut tlaikhawhnu zawkte duhsak zawk leh ngaihsak zawk an awm em? In thlauhthlak luih tlatte vui thawm chu a ri ret ret tan em? Ngaihtuah chiang rawh u aw. A theih chin china a rualkhai thei ang bera in tih loh chuan in daih rei lo ang.
Thil pakhat, therhlo beisei vang chauhva ZPM party-a intatlut, kalphung hlui zia ang deuhva secretariat vela teihawi thin mi tlemte tute emaw han hmuh thin hian, ZPM sawrkarah chuan inhmeh lo ka lo ti deuh thin a, a ngei pawh ka lo ngei deuh thin a ni. Mahse, khawvel political party-te tih dan leh mihringte tih tur pakhat kha a ni ve miau si a.
Aw le, khiti khian han sawi chiam mah ila, a tak takah ZPM hi a chhe ta viau emaw, tlak hniam lam an pan ta tihna emaw pawh a ni lova, duhsak leh duhthawh luatah fimkhur thu hla atana sawi mai chauh ka ni.
A tak takah chuan ZPM party hi mipui tam zawk hian kan ram hruai turin kan la duh ber che u a. Tuna in kal anga rilru hrisel tak pu chunga, engkima Pathian rawn chung leh Pathian tihna tak tak nen fimkhur taka in kal zel phawt chuan, India rama party pakhat sawrkar rei ber record pawh in siam thei hial maithei a nia aw. Isua lo kal leh thlengin kan ram hi han hruai law law teh u.
ZPM hi kalphung thar danglam bik tur anga in insawi avanga mipuiin beisei taka an thlan che u in nih avangin, ZPM mi leh sa zawng zawng pawhin kalphung hlui party mite tih dan ang bawka politic leh ram rawngbawlna hi sumdawnna leh intihhausak nan chiaha hman tur emaw in tih a, in thluaka sum in luhtira, duham leh hmasial viau leh, therhlo beisei ringawta in khawsak chuan, nangmahni in buai phah anga, hotute lu in ti hai bawk anga, in inti hrehawm mai mai ang. Tin, in beisei ber pawh chu beisei tur nei thei lovin in sawrkar reng lo phah thei tih hriat a tha a ni. Chuvangin, kalphung tharah chuan rilru hrisel tak pu chunga, fim tak leh mawi taka tiha, a awm tawka khawsak thiam a tha ang. Chu chu in daih rei theih phahna tur a ni bawk ang.
Amaherawhchu, tuna in dinhmun ang renga awm reng tur emaw in intiha, a tu-a-te pawh a lian ber atanga a te ber thlenga in inthlahdah chhoh vaih emaw, khi’ng ka thu sawite khi in bengkhawn that duh loh luiha, in siam that duh loh thung emaw chuan, in rin aia hmain harsatna in tawk thei a nia aw.