ZRI Vohbik’s Got Talent winner Vanlalfela
Zo Ri-Mawi International Charity Group ten vohbik te puala ZRI Vohbik’s Got Talent an buatdaih chu Inrinni zan khan an zo ta a, tawngtheilo leh bengngawng Vanlalfela s/o Hrangthanga, Bungtlang khua, Ramhlun North a khawsa mek chu Pakhatna a ni. Ffela hian a nupui (bengngawng leh tawngtheilo ve tho) nen fa pahnih an nei tawh a ni.
ZRI Vohbik’s Got Talent winner Vanlalfela hian lawmman Rs 1,00,000 bakah chawimawina thuziak leh lehkha bu bakah Sun Rider atangin thilpek chi hrang hrang a dawng a, ZRI Life Member nihna pek nghal a ni bawk.
Vanlalfela hian thiamthil chi hrang hrang a ngah hle a, kitchen cabinet siam a thiam hle a, lemziak leh chei bakah thil lem siam te pawh a thiam hle a ni.
He talent show-ah hian round hmasa berah mi 54-in video clip an theh lut a, chuta tang chuan endikin, ruand hnihnaa lut tur mi 20 an thlang chhuak leh a ni. November ni 24 zanah Top 20 ten Zarkawt Community Hall-ah intihsiakna neiin, a ti tha zual mi 12 thlan chhuah an ni a, December ni 2 zanah grand finale an nei ta a ni.
ZRI chuan thuchhuah siamin, “ZRI Vohbik’s Got Talent 2023 hlawhtling taka kan buatsaih theihna chhan hi ZRI CHARITY GROUP tana mi inpe tak tak te avang leh Aizawl khawpui chhunga kan Life Member te bakah khawvel hmun hrang hrang a awm, kan Life Member te thahnemngaihna zara hlawhtling thei kan ni a, he kan event neih hi a hautak hle a, Rs 4,00,000 chuang hial sen ral a ni a, sum leh pai tam tak seng tute leh, thil hrang hranga min sponsor-tu te chungah kan lawm tak zet a ni. A bulpui ber chu mirethei leh chhumchhia, miharsa te leh rualbanlo (Vohbik) te hmangaiha, an lama tang tlat thin kan Pathian engkim titheia malsawmna leh awmpuina, kan dawn vang liau liau a ni,” an ti.
ZRI Vohbik’s Got Talent winner Vanlalfela
Prev Post