Zu-in hypertension tisang nasa thei
Zirchianna thar berah ni tina zu no khat lek in pawhin puitlingah hypertension nei lote pawh blood pressure a tisang thei tiin tarlan a ni a. He research hi American heart Association journal Hypertension-ah tihchhuah a ni a.
Zirchianna neitute hian kum 1997 atanga 2021 inkara international study pasarih atanga data te an zirchian leh hnuah ni tina zu no khat lek in pawhin zu in miah lote aiin blood pressure sang zawk a nei an ti.
“Zu in miah lote aiin zu in tena hriselna atana hlawkna an neih kan hmu lo” tiin Dr Marco Vinceti, he zirchianna kalpuitu chuan a sawi a. “Mak kan tih zawk chu zu tlemte in pawhin zu in miah lote aia blood pressure sang zawk a nei chu a ni,” tiin a sawi bawk.
He zirchiannaah hian United States, Korea leh Japan a puitling 19,000 chuang data hman a ni a. Ram hrang hranga zu in hrang hrang leh tam dan hrut rual a nih theih nan ‘standard drink’ siam nan zu chu gram zawngin an teh a. Entirnan, World Health Organization (WHO) pawhin standard tia a siamah 10 grams hmangin US chuan 14 grams a ti thung.
Zirchianna chuan ni tina zu tlemte chauh in te pawhin kum a vei chuan zu nghawng avangin systolic blood pressure a sang tial tial tiin an sawi a.
“Systolic leh diastolic reading te chu cardiovascular lama harsatna thlen thei ve ve niin an pahnihah hian puitling te tan chuan systolic blood presusre hi pawimawh zawk a ni” tiin study co-author Dr Paul Whelton chuan a sawi.
Blood pressure te hi milimetres of mercury (mm hg) a teh a ni a. Blood pressure measurement chuan number pahnih : A sang zawk (systolic) heart muscle inneksawr nain thisen a pump nasat leh a hniam zawk disatolic, thinphu ran dan tehna a ni a. American Heart Association te chuan systolic reading chu kum 50 chin chunglam te tana cardiovascular disease lama hlauhawm tiin an sawi.
Normal systolic reading chu a tlangpuiin 120 mm Hg emaw a aia hniam deuh a ni a, mahse heng hi blood vessel a chak loh chuan sang theiin kum azirin a zim tial tial thei a. Normaldiastolic reading chu 80 mm Hg niin hei pawh kum azirin arteries te thawl ve zelin a tlahniam ve thei bawk.
High blood pressure hi ‘silent killer’ tia sawi niin heart attack, stroke, chronic kidney disease leh natna hrang hrang te thlen thei a ni.