Zu khapna dan tihdanglam tumna pu lut lo thut

On Mar 6, 2025 9 0

Budget Session neih mekah Nilaini khan Mizorama zu khapna dan tihdanglam tumna Mizoram Liquor (Prohibition) Amendment Bill, 2025 put luh tum a ni a, Nilainia an tih tur List of Business-ah pawh telh vek ni mah se chawpchilh takin an thulh thut.
Leader of opposition Lalchhandama Ralte, Dr K Beichhua, BJP leh C Ngunlianchunga, Congress te’n Nilaini khan session tan hmain speaker an hmu a, he bill chungchang hi an thlen. Speaker hian session-ah Mizoram Liquor (Prohibition) Amendment Bill, 2025 sawiho hun sawn a nih thu a puang ta a ni.
“Dan bawhchhiat a tam a, he thil hi kaltlangpui chi a ni lo a, put luh an tum dan hi ram leh hnam tan a tha lo tlat a, chu chu speaker hnenah kan thlen a ni,” tiin Lalchhandama Ralte chuan The Aizawl Post a hrilh.
Dr K Beichhua pawhin sorkarin he bill put lut a tum dan a dik loh thu, dan bawhchhiaa ti an nih thu a sawi a, “Speaker tan pawh kumkhuaa hmingchhiat theihna tur thil a ni,” tiin The Aizawl Post a hrilh.
Dr Beichhua sawi danin, Session-a bill put luh hi member-te’n an lo zir chian theih nan a hma ni li velah an sem thin a, February ni 22 khan Mizoram Liquor (Prohibition) Amendment Bill, 2025 hi an dawng tawh a, mahse March ni 4 zan dar 9 hnuah a thar an dawng ta thut mai a ni.
“Bill put luh tur reng reng hi finance department kaltlang a ni tur a ni a, law department kaltlang a ni tur a ni bawk a, chu chu council of ministers-in an thial leh thin. Thawhlehni zan dar 9-a kan dawn khan chutiang chu a pal tlang em ni? Council of ministers-in an thial em ni? Member-te pawhin kan zir hman hlei nem,” a ti.
A thar an dawn chu an dawn hmasak tihdanglam pawh a ni lo a, a bill no pawh an thlak avangin bill thar liau liau a ni tiin a sawi.
“An thil tih dan hi a holam lutuk a, dan bawhchhiat a tam a. Hetiang hi kan pawm a nih chuan sorkarin hma zanah chawpchilh deuhin member-te min pe ang a, a tukah ngaihtuah chiang lovin dan min siampui thut thut thei dawn tlat a, ram tan a tha lo a ni,” a ti bawk.
Speaker Lalbiakzama’h he bill sawihona hun sawn hlat a nih thu hi House-ah a sawi a, opposition leader, BJP leader leh Congress leader te’n amah an hmuh thu sawiin, hun a chawpchilh tih an sawi a, chu chu awm a lo tihpui a, house leader leh parliamentary affairs minister te a rawn a, ni dang atan sawn a ni tiin a puang.