Zuai khat Cheng Zahnih!

BY Tpa Bunghai

Ka bula thu kum 68 mi chu zunthlum leh BP sang nei a nih avangin zin kawng zawh mêk mah ni ila, a chaw ei hun pangngai bawh pelh lo thei ang bera tukthuan ei mamawh a ni. Nerve tha lo avanga kum 5 zet in lama tawm tawh, a kawng hnuai lam chak vak tawh lo kum 69 mi kan chhungkaw thian tha tak chu a pum a ri rak rak a – khualzin phur motor Sumo bulah chuan kan ding dat a, kawngchhak lama in hnuai, a banga ‘hotel’ tih inziak lam chu kan pan zui nghal zat a, khualzin tukthuan lo kil mêk hi an lo awm nual. Cooker phit ri leh vawksa chhum hmui rim nam veng veng chuan khualchhawntu leh min lo chiauau-tu awm lo mah se, min ti tlangnel nghal thuai phian – mamawh awmna hmun ni tlat hek le.
Chawthleng pathumah chaw khu vung vungin an rawn chhawp a. Antam tlak leh bai dai dup, chi, hmarcha hring leh purunsen rawt pawlh te chu rang takin kan dawhkanah chuan insuah tawm turin a rawn thleng chawpchilh nghal thuai. Chutah le, thleng kum hlai hlupah hian vawksa hrang (piece) 15 hi an rawn chhawp leh a, bawngsa ti hrang 8 a rawn thleng zui nghal zat bawk. |um tam tak chhuan sat nawn tawh tih hriat em em, arsa kan mawm eltiang dum ren run hi an rawn chhawp leh a, ei ka tum loh avangin a hrang zat ka chhiar kher duh ta lo! Ka kianga kum 70 kai thuak ka zinpuite pahnih chuan chaw an bar a, an hnungzuiin keiin thirfiante (spoon) in ka chaw ka hawlh a, a sak talh mai!
Mizo pa pathum mahni puala kum tam fê voter’s ID kawl theuh tawh kha kan ni bawk a, vawksa thau var vu leh a ti khal deuh chu kan hawlh hmasa ber tliar tliar a – a hmin lo, a la hel! Bawngsa ka’n ban leh a, ei ngaihna a awm lo – a la hel ve tho! Arsa kan dum ren run chu kan hawlh zui sek lo thei ta lo – mikhual tukthuan ei tur an rawn luh belh ve zel avangin hmeichhe pathum leh mipa pakhat chuan min vil hneh ngang lo a ni. An choka lamah chuan ka inher vut a, zawi tê thum dutin, vawksa leh bawng sa hmin loh thu ka hrilh a – inthiam loh hmel deuhin vawksa chu ‘bel hlui’ zawk a mi an rawn suah tur thu hrilh ka ni. Ka lêt leh chu ka zinpuite pahnih kum upa lam tawh chuan vawksa leh bawngsa chu an lo suak zui tawh lo va, antam tlak tui leh bai chu an lo inhawlh chhawk deuh ngat ngat a. Rei lo te hnuah vawksa bel hluia vawksa chu kan hmaa vawksa hel suahna thlengah chuan an rawn chhung lut hnawk a, sa kan nei tam ta viau. Phur takin vawksa an rawn chhawp thar chu ka’n suak zui a, saum uih rim zu han nam nia! Mikhual ei bân’ changa a hmaa lo tei sek zawhte ngiau ngiau chu ka ke bulah a thu deuh run a, an sa chi thum min chhawp chu mihring tân ei chi zuk ni suh, ka pe mial mial… “Sa hi a hel a nia” titu kan piaha dawhkan kil driver phun bul bul chu kan melh nui thu hlawm a.
Chu hotel-a kan luh lama kan phur nen, chhuah lamah chuan riltam a zia deuh e tih a ni mai – chaw ei zuai khat chu mi pakhat tân cheng zahnih a ni! Kamthuah zawha tui in tur a awm loh thu leh tui lei tur takngial pawh a awm loh thu chu sawi chipchiar tawh lo ila. Kei thalai tha za zar tân chuan a palzam theih rualin ka thurualpui kum upa tawh tak te pahnih leh khualzin kawngkam hotel a chawl zui zel tur te ka ngaihtuah a ni. Sa chhun khawm ruih tam hnur ai chuan hrang thum tuihnai tak mi pakhat tân chhawp se, a kham lo tân chawi belhin lam nawn theih mai ta se. Mi hrang hrang tân thleng pakhata insuah tawm tura chhawp teuh ai chuan mi pakhat chanpual zel turin tarlan tak ang hian chhawp ni se a awlsamin customer tân pawh a tuihnai hrim hrim. Sa heh deuhin an lam nawn sek tawh mai ang a – dawr neitu tan a hlawk daih zawk bawk ang.
Mizoram chhung kawngkam ve tho a chaw ei theihna hnam dang dawrah hian hetiang hi tawn tur a vang – eizawnna an la lungrunin an ti tak tak a, an neih chhun hi a tui emaw tui lo emaw, a ngai pat thei reng. Sa insuah tawm tura kawngkama a ram neituten an chhawp ang hi an chîng ve tlat lo! Hetiang ka sawi Mizo dawr hi a tha karah a tha lo inzep palh hlauh ni se a duhawm ngawt mai. Chutih rualin tu te sa ei bang chhuan lum hnu emaw hi chu hmun tam takah hi chuan a kal tlai apiang hian kan ei em? Rin kan nei thup ang, a zia lo lam deuh a ni. Thianghlimna lamah tan lâk a, kan ti ta sa sa a nih chuan hei aia khua leh khua inkara ei leh in lo chhawpchhuak thinte hian khualzinte pan nawn tlaka tan an lâk fe a ngai. Hetiang kan sawi rual hian, pan rawn nawn tlak leh zuai khat atana tawk hi khualzinte hian kan chhinchhiah hlawm khiau a, service tha chu pan rawn an hlawh zel ang. Customer remchanna aiin kal pah deuha sum lo siam nana hmang mai mai chuan dawrtu an nei lo tial tial ang – he sumdawnnaa telte hian thui tak thlir se.