Zuangtui Industrial Estate-ah allot zat aia a leta tam awm

Zuangtui Industrial Estate-ah
allot zat aia a leta tam awm
Mizoram sawrkarin industry din duhte tana dinna hmun tur a siam, Industrial Estate Zuangtuiah chuan dan ang taka awm theihna pek (allot) zat aia a leta tam an awm mek tih sawi a ni.
Assembly Session neih zawh takah khan sawrkarin industry dinna hmun a neih hoa awmte leh heng hmuna awm diltu zingah a tak taka hma la ho dinhmun hi sawichhuah a ni a. Industry minister chuan, Industrial Estate Zuangtuiah hian mi 181 allotment pek an ni a, heng zinga 119 hi a tak takin a function tih a sawi. Hetihlai hian he Industrial Estate huamchhunga inbengbel zawng zawng hi allotment pek (181) let vel an ni mek tih a sawi a ni.
Tunah hian department-in spot verification an nei mek a, survey an nei dawn tih an hriat avangin mombati siamna, puantahna khawl tih angte bun thar an tam tih sawiin, “A guideline-ah ‘industry’ tih chinah thliarna fel tak a lo awm si loa, puanbu pakhat nei pawhin industry neiah a inngai si a, thliarhran a ngai dawn a, hma lak mek a ni,” a ti.
Export Promotion Industrial Park (EPIP) Lengte-ah allotment 23 awmin, function 15 a awm a, EPIP ram nektu an awm nual tih minister hian a sawi. Lengte-ah hian hmun hrang hrangah saw mill an din a, a bawlhhlawh siam a hnawk a, saw mill ho hi hmun khata dahkhawm dan ngaihtuah mek a ni tih a sawi. Hetianga an tih hnu chuan a bawlhhlawh awm ho hi hman tangkai zui dan, fian leh fork siamna atante hman theih dan zawn a ni anga, a zaina nawi pawh plyboard siamna atana din duhtu an awm tih a sawi a ni.
Industrial estate hoah hian trade inang a hlawma dah dan dap mek niin, GIS mapping ti vek dawn tih a sawi bawk.
Industrial Growth Centre Luangmualah allotment 61 a awm a, 18 a function tha a, 27 function lo an awm. Allotment pek 11 cancel tawh a ni tih a sawi.