Zudio LPS Pro Fight 2024 a hmuhnawm!

Zudio LPS Pro Fight 2024 a hmuhnawm!
December ni 3, 2024 (Thawhlehni) kha LPS Arena, Falkland-a Zudio LPS Pro Fight 2024 kal laiah a zan 26-na niin, inhnek vawinga a awm a, result kan thlirkual dawn a ni.

WOMEN’S CHALLENGE FIGHT

BANTAMWEIGHT

Lalbiaknii (Kolasib) bt
L. Vanlalduatsangi (Siaha)
Split Decision (27-30, 29-28, 29-28)

Inhnial theih takin kum 19 mi Biaknii a chak a, round thumna an inhnek chhungin tharum leh thahrui nei zawk Siaha tleirawl Duati’n round hnuhnung berah nawr hneh mah se judge pahnihin 29-28-in Kolasib boxer an chaktir a, pakhatin round tinah Duati a pe tam ve thung.
North East medal la tawh Biaknii’n a hnuai leh chung hnek zawnin an inhnaih laiin a kutchhuak a dik a, round hnihnaah zei taka vawi li hnek zawn hnuah a ngilin a tawpah a fuh a, mahse, a fei tawk lo.
Mizorama gold medal 12 la tawh kum 19 mi Duati’n October thla mai khan Mizoram Championship, Hnahthialah sawisel theih takin Biaknii a hneh lo tawh a, chak ngei tumin a tir atangin a nawr tam a, a ngila a vei leh ding a chhuah zawnin awmzia a nei a, khelh dan erawh a nei tam tawk lo.
A chak loh rualin Duati’n hriatthiam har a ti hle a ni.

LIGHTWEIGHT

Rudy Lalhmingmuani (Salem Veng)
bt Rebecca Lalfakawmi (Chuhvel,
Mamit Distict) Unanimous Decision (30-27, 30-27, 30-27)

Kum 20 mi Hmingmuani’n boxing tha lantirin Chuhvel tleirawl Fakawmi a thunun tluan a, round tin la vekin chiang takin a hneh.
A tir atanga a tawp thlengin an inhnek tawk lo deuh a, Salem Veng boxer-in rang taka a vei lam a chhuah thin a hmang thiam a, a hnek chhuah zawn hmangin lehlam a tibuai bawk a, thiamna lamah a chungnung tih an inkhelh chhungin a lang.
Kum 18 mi Fakawmi’n pan hnaiin hnek fuh chang nei mah se a chhanglet zo lo a ni.
Women’s Challenge Fight lawmman hi a chak zawkin Rs. 10,000 an dawng a, chak lo zawk kutah Rs. 5,000 a lut thung.

FINAL (TITLE CHUH TUR ZAWNNA)

BANTAMWEIGHT

Omega Lalramdina (East Kulikawn) bt Eric Lalthangkima (Darlawng)
Split Decision (39-37, 37-39, 39-37)

Ban sei zawk a nih avangin kum 22 mi Ramdina’n a hnaih tam lo a, a ban phak atanga a hnek thin chhawrin Thangkima a hneh hram.
Judge pakhatin 39-37-in kum 18 mi Darlawng boxer pe hnem mah se judge pahnihin 39-37 ve vein an chaktir a, hnehna ban a phar rualin a lawmzia lantir nan chhuatah Ramdina a bungbu a, a thlen chin sang a tih thu sawiin, “Ka phu lo, ka lawm em em a ni” a ti.
A vawikhatna’n Title Fight-ah East Kulikawn boxer a inlan dawn a, naktuk, Zirtawpni zanah WBC Youth bantam world champion Laldinsanga kawnghren kawl lai chhuhsak a tum dawn a ni.
Ramdina chuan tunlaia Mizo boxer tha ber ang hiala ngaih Dinsanga nen Sete Boxing Academy-ah an inhnek fiam fo tawh tih a sawi a, a hneh thei ang em tih zawhna chhangin, “Dik taka kan inhnek theih chuan a lawmawm ngawt ang” a ti.
Semi-final lama a inhnek dan aia nung leh hriamin Thangkima’n a khel a, mahse, tawnhriat nei zawk leh tawlh kual chunga hnek zauh zauh thin Ramdina’n hnek tam a pawimawh tih hriain a nawrtu zawkah a tang hnem a, inhnehtawk takin round li an hmang tluan.
Round hmasa berah chiang takin Ramdina’n a hnek dak a, a ding lamin a bekah vai zawnin a taksaah a hnek tel a, fuh takin a dawm bawk.
Round hnihnaah Darlawng rawltharin a khel tha zawk viau thung a, hnek fuh nghalin, lehlamin a hnek hnuah tha takin a chhanglet bawk a, Ramdina’n chet a harsat.
Round thumnaah Thangkima insawrbingna a tlahniam ta tlat a, East Kulikawn boxer-in vawihnih vai fuh zawnin a hnaih chilh tam lo a, lehlam inthlahdah laiin rang taka a hnek bakah round tawp dawnah hnek fuh zawnin a kuttum a langsar zawk.
Round hnuhnung berah Thangkima’n a bekah vai fuh ve leh nghalin, tan hmun siamrem tum mah se ban sei zawk Ramdina’n a vei ngil thui tak hmangin a chhanglet a, a ban phak atanga a hnekin awmzia a nei fo a, Darlawng rawltharin pan hnaiin inhnek tawnah pawh an inchhang tawk hle a ni.

WELTERWEIGHT

Lallawmawma (Tuipui) bt Zoremsanga (Venghlui) Unanimous Decision (39-37, 40-36, 39-37)

National Games silver medal la tawh Lawma’n a thiamna tuaihriam zelin, Venghlui rawlthar Zorema lakah judge pakhatin round tin a pe vek a, judge pahnihin 39-37-in an chaktir a ni.
Pro Fight-a a tel hmasak berah cha mpion nghal thei turin kum 22 mi Tuipui tlangvalin hmabak pakhat chiah a nei tawh a, Zirtawpni zanah champion lai Lalruatzela Hauzel nen title inchuhin an inhmachhawn dawn a ni.
Championship kal meka Lawma chak zawn vawi lina a ni a, tute mahin a dinhmun tiderthawng khawpin an hnek zo lo.
Kum 17 mi Zorema a hneh hnuah, “Ka duh angin ka inhnek chhuakin ka hria,” a ti a, champion lai Ruatzela lakah a chak ngei a inring tih a sawi bawk.
Veikhawr Lawma’n a vei lam a hmang hnemin a hlawhtling tam a; a tir atangin amah aia inchi lia sang leh ban zei zawk Zorema a ngampa tawk lo a, a inveng nasain a hnek chhuak tam lo.
Tuipui boxer-in panin rang taka a vei lam a hnek zawn leh nalh taka a ding lama a dawm thin hmangin a insawhnghet a, lehlamin a ngilin hnek zawn mah se a thleng pha lo tam hle.
Lawma tan chet a awlsam a, Zorema’n a ngila hnek fuh ve chang nei mah se an inhnek tam hleih a, hnek dan chi hrang hmangin chungnung zawk a nihna chiang takin a lantir.

MIDDLEWEIGHT

F. Lalthanliana Jr. (Electric Veng, Lunglei) bt C. Lalduhawma (Bethlehem Vengthlang)
Split Decision (39-37, 39-37, 37-39)

Kum 24 mi Thanliana’n thahrui leh tharum a neih that chakpui lehin, a tirah bet zawk mah se Duhawma lakah fiahna pawimawh a paltlang a, judge pahnihin 39-37-in an chaktir a, pakhatin 39-37-in lehlam a pe hnem ve thung.
Title chuh tur zawnna semi-final bout-ah Electric Veng Lunglei boxer hian tun ang bawkin round hnuhnung lamah John Lalruatsanga nawr hnehin a chak tawh a, nikum title fight-a a tlawmna chhanglet turin C. Lalruaitluanga nen an intawng nawn leh ang.
Kum 2019 middleweight champion a nih hnuah tun hi Pro Fight-a Duhawma tel leh hmasak ber a ni a; title lak kirleh tumin vawi thum a chak zawn hman a, a khelh danin hmasawn zel mah se Thanliana hmaah a fei tawk lo tih a lang.
Round hmasa berah fimkhur dun takin an inhnek tam lo a, Bethlehem Vengthlang boxer-in panin, a hman thiam a vei lamin a hnek zawn a, awmze nei thamin lehlamin a chhanglet lo.
Round hnihna atangin Thanliana’n a vei leh ding chhuah zawnin lehlamin a ven that loh a taksaah a hnek tam tial tial a, Duhawma kuttum vei lam erawh a veng hneh bik chuang lo.
Round thumna tir lamah Duhawma’n nawr hnehin a vei lamin chiang takin a hnek fuh fo a, mahse, Thanliana’n tuarchhuakin a beilet a, a taksaah a hnek zawn tam.
Mar takin round hnuhnung ber thlengin a bei tluan a, lehlam tlahniam ve thungin, inven a harsat a, a ngila a chung lama a hnek zawnin hna a thawk tha tial tial a, a tawp lamah langsar lehin, a vawihnihna’n GIG Motors Fighter of the Night-a thlan a ni.
Thawhlehni zan hian WBC Youth bantamweight world champion Laldinsanga chawimawina hun tawi hman niin, a champion kawnghren nen hruihrual chhungah phochhuah a ni.
Thawhlehni zan inhnek zawhah lawmman tangka fai Rs 3,000 keng tel GIG Motors Fighter of the Night atan F. Lalthanliana Jr. (Electric Veng, Lunglei) thlan niin, Astoneaone Fan of the Night-a thlan chu ZD Lalchhuanawma (Chanmari Lunglei) leh Lalengmawii (Maubawk)-te an ni thung.
Title chuhna final-a tlate’n lawmman pawisa fai Rs. 15,000 theuh an dawng.

Zudio LPS Pro Fight 2024 fixture

Zan 27-na December 6, 2024 (Zirtawpni) – 8:00pm : Bout 5 @ LPS Arena, Falkland

TITLE FIGHT

Zai : J. Lalrosanga (LPS Youth Icon Top 5)
Khuallian : Zothantluanga, Zudio Store

WELTERWEIGHT

Lalruatzela Hauzel (Mission Veng, title Holder) v Lallawmawma (Tuipui)

LIGHTWEIGHT

B279 Lalkhawngaiha (Venghlui) v C Lalhruaitluanga (Cherhlun)

FLYWEIGHT

Vanlalenkawltira (Dinthar Champhai) v Lalrinngheta (Tuipui)

MIDDLEWEIGHT

C Lalhruaitluanga (Chawngtlai, title Holder) v F Lalthanliana Jr (Electric Veng Lunglei)

BANTAMWEIGHT

Laldinsanga (Ramthar Lunglei, title Holder) v Omega Lalramdina (East Kulikawn)

Title Fight-a inlan turte vawiin, December ni 5, 2024 (Ningani) zing dar 8-ah LPS Office-ah an inbuk dawn a; zan dar 8-ah LPS Auditorium-ah an puala hun hman zui tur a ni a, an inchona sawichhuakin, hmaichhanah an intawng ang.