Zudio LPS Pro Fight 2024
Thawhtanni zan quarter-final inhnek chanchin
November ni 25, 2024, Thawhtanni zan khan a hmun ngai LPS Arena, Falkland-ah Zudio LPS Pro Fight 2024 quarter-final inhmek vawisarih awmin, result hrutkual dawn teh ang.
-- Advertisement --
BANTAMWEIGHT
Omega Lalramdina (East Kulikawn) bt Gregor Joseph (Vaivakawn) = Split Decision (29-28, 29-28, 28-29)
Kum 22 mi Ramdina’n ban sei zawk a nihna chhawrin tawlh pahin hnek fuh fo mah se, Joseph-a’n panin a ngila a hnek zawn hmangin a tibuai a, round khatnaah a che chhe lo.
Boxer pahnihte hi inveng chunga hnek chi ve ve an ni a; round hnihna atangin East Kulikawn boxer-in a hnek chhuak tam a, a pantuah tang foin, lehlam taksaa a hnek thin bakah a invenna karah langsara hnek fuh a nei fo a, Joseph-a’n a tawp thlengin a khelh dan pangngaiin a chhanglet ve thung a, an inhnehtawk hle.
LIGHTWEIGHT
Lalruatmawia (Chhiahtlang) bt
Vanzairemmawia (Lungtian I)
= Unanimous Decision (29-28, 30-27, 29-28)
Pro Fight kal meka inlehthalna lian ber thlentirtu Ruatmawia’n mar takin round thum a hnek tluan leh a, Remmawia’n a dang zo lo.
Boxing inelnaa a tel vawikhatnaah kum 20 mi Chhiahtlang tlangval hian round of 16-ah thahrui leh tharum tha tak hmangin rin hlawh zinga mi Ramdinthara a barakhaih tawh a, round thum chhung a tuar hnem hle chungin Remmawia lakah phu takin a chak zui leh.
Lungtian I fighter aiin a kut a rang a, a hnek chhuak tamin hnek dan a hmang hnem zawk bawk a, inhnaih chilhah chungnun gin tharum ngah tak Remmawia’n khelh dan nghet a neih a hlawhtlinpui zo ve thung a, a vei leh ding a chhuah zawn bakah khelh dan dang hmang turin a insiam rem thei lo.
MIDDLEWEIGHT
John Lalruatsanga (Kawlkulh) bt
Lalhriattira (Tuithiang)
= Unanimous Decision (30-27, 29-28, 30-28)
Pro Fight-a a tel vawikhatnaah Ruatsanga’n semi-final a lut a, boxing inelna danga tawnhriat a neih tawh bakah hnek thui zawk a nihna chhawrin a ban phak atanga a hnek zawn thin hmangin Tuithiang rawlthar Hriattira tan harsatna a siam a, dik tha taka vai chhuah nei tel foin, a hnek chhuak taima bawk.
Kum 18 mi Hriattira’n huaisen takin amah aia kum sariha upa a nawr hnem viau na a, a hnek fuh rualin lehlam hneklet a dawng hnem a, a bet zawk ni chungin mar takin a khel tluan thei thung.
F. Lalthanliana Jr. (Electric Veng Lunglei) bt Cleason Lalrawngbawla (North Vanlaiphai)
= Knockout (Round 1, 2:32 min)
Champion kawnghren hren a tumna kawngah Thanliana’n rahbi tuk sang zelin, round khat hmang tluan loin Rawngbawla a hneh a, vawihnih a khelh tawhah harsatna lian a la tawk lo.
North Vanlaiphai boxer nen a tir lamah inhnek tawk viau mah se an kutthlak a inthlau a, hnek na zawk Thanliana’n round khatna tawp lamah chiang takin a hmaiah a hnek a, lehlam talbuaiin a um zui a, a veilamin a beka a hnek sak hnuah a ding lamin a hnek tlu a, chiang taka a chak rualin GIG Motors Fighter of the Night-a thlan a ni.
FLYWEIGHT
Vanlalenkawltira (Dinthar, Champhai) bt Dolrich Zothansanga (Mualcheng South) = Unanimous Decision (30-27, 30-27, 30-27)
Nikum flyweight title fight-a NT Lalbiakkima a hneh loh atangin Enkawla’n champion duhna a nei nasa zual a, a thiamna leh theihna tuaihriamin, Mualcheng South rawlthar beiseiawm Zothana hmaah inhnek a thunun a, round thum a la vek.
Kum 18 mi Zothana’n thiamna pangngai tak nen bei mah se kutthlak na zawk Enkawla’n a invenna kaltlangin vawinga vel a hnek zawn bakah a taksaah chiang tak takin a hnek fo a, kawng hrang hrangah an la inthlau deuh.
WELTERWEIGHT
Zoremsanga (Venghlui) bt R. Lallawmmawia Duhlian (Zemabawk East) = Unanimous Decision (30-27, 30-27, 30-27)
Seeded zinga mi Venghlui boxer Zorema’n thiamna hmangin inhnek a thunun a, hnek thui zawk a nihna thiam taka a lantir bakah inhnaihchilhah hnek dan hmang tam leh hnek dik zawk a ni tel bawk.
Thahrui nei tha leh fei tak Lawmmawia’n round hnihna atangin chet a harsat zual a, hma lam pana a ngila hnek zawn bak khelh dan dang a neih tam loh avangin hnek fuh ve reng mah se awmzia a nei tawk lo.
HC Lalramfela (Chawngtlai) bt
Lalremruata (Kawrthah)
= Unanimous Decision (30-27, 30-27, 30-27)
Light title kalsanin welter-ah kum 2015 bantam champion Ramfela a insawn a, Pro Fight-a a tel hnuhnun ber tur a ni tih sawi lawkin, weight hrang pathuma champion hmasa ber nih a tumna a kalpui zel.
A huhangah Remruata’n a ngam lo sa a, a tir lamah hnek tha viau mah se kum 29 mi Ramfela hnek a tawrh zawn hnuah a inveng nasa a, inrintawkna nei tur khawpin a chhanglet lo tluan a ni.
Chawngtlai boxer-in langsar taka hnehna a chan rualin vawihnih a inlan tawhah a khelh thin dan a pha lo zui zel a; a chet ran tawk loh bakah hnek fuh a harsat a, taksa chet vel pahah rang taka a hnek zawn thin dan a lantir zo lo.