Zunthlum (diabetes) hi tunlai natna tam ber pawl a ni ngei ang. Kum lama naupang deuh te pawhin an nei ve ta zel mai. A tihdamna a awm lo a nih pawhin in enkawl theih a ni a, zunthlum ten an blood sugar level an tihhniam theih dan tha tak pakhat chu exercise lak a ni. Tun tumah hian Times of India health section-in zunthlum tana exercise lak dan tur tha ni a an sawi te kan rawn tarlang e.
Zunthlum nei tan exercise tawng pawng lak ngawt ai chuan, kan taksa mamawh tur exercise thlan thiam a pawimawh a, midang tana tha kha kan hlawkpui ve kher lo thei tih pawh inhriat tur a ni a, chuvangin kan taksa tana thawk tha, thawklehkhata blood sugar tihniam thuttu ni lo kan zawn thiam a pawimawh a, tun tumah hian kan taksa tana tha tur thlan theinan a bul tanna tur kan rawn tarlang dawn a ni.
1. Chak deuh hleka ke a kal (brisk walking): Tlan pawh a tha viau a, mahse, tlan chuan taksaah pressure a siam hnem a, chuvangin zunthlum nei tan chuan tlan aiin chak deuh hleka kal a fuh zawk mah. Taksa a tilumin, thlan a titla a, blood sugar level siamtha tawk a ni tho. A tlem berah kar khatah tuk thum tal, tum khatah minute 30 tal brisk walking i ti dawn nia.
2. Lâm: Exercise lak hi i thatchhiatna lam tak a nih tlat chuan taksa sawizawina dang ngaihtuah a ngai a, chutiang atan chuan lâm (damcing) a tha hle a ni. Aizawl-ah pawh lam zirna te a awm ve ta neuh neuh a, hengah te hian inziak lut ve chhin teh. Kar tluana lam kan zir hian blood sugar level a tihniam thei. Chubakah a nuam kan tiphian dawn bawk si!
3. Tuihleuh: Tuihleuh maina tur kan nei hnaivai vak hlawm lo a ni mai thei, mahse, tuihleuh hi zunthlum tana exercise tha ber pawl a ni tlat mai. A nuamin a hlimawm mai bakah rihna paihna tha tak a ni a, chubakah ruh chuktuah-ah pressure a siam ve lo. Kar khatah tum thum tal tui hleuh theih a tha hle a ni.
Zunthlum tana exercise tha
Get real time updates directly on you device, subscribe now.
Next Post