Zverev kutah Paris Masters title

Zverev kutah Paris Masters title
6-2 6-2-a French number one Ugo Humbert sawpin Pathianni zan khan world number two thar Alexander Zverev chuan a career-a a vawikhatna atan Paris Masters title a hlawhchhuak a; kumin chhung bik final-a vawili an intawn tawhah Zverev leh Humbert hi vawihnih ve ve an chak ta a ni.
Tualchhung tlangval tantu ngah leh chak tura rinkai zawk hnehtu German tlangval Zverev khan a career-ah ATP 1000 title pasarih a la tling chiah a ni.
Kum 27 mi Zverev hian karliamta Inrinni semi-final pakhat zawka hnehna a chan rual chiah khan kumin June thla French Open final-a a ngam loh Carlos Alcaraz hmakhalhin ATP ranking tharah pahnihna a luahkir leh.
Kum 26-a upa Humbert pawhin tuntum Bercy veng Palais Omnisports-a tournament tir lam last 16-ah rinkai zawk Alcaraz hnehin, a hnu lamah pawh chak zelin a vawikhatna’n Masters final a lut a, kum 13 chhunga he indoor event-a French finalist ni thei hmasaber a ni.
May thla Rome khaw clay-a champion Zverev tan tun kha season kal laia a Masters trophy pahnihna ni nghalin, Pathianni final-a a chak chiah khan German hian world number one Jannik Sinner lehpelin kumin chhunga chak ngun ber nihna a chang a, vawi 66 a chak tling chiah a ni.
November ni 10-17 chhung hian Turin khuaa mipa tennis hmawrbawkna ATP Finals a khel zui dawn a, a champ leh chuan vawithum a champ-na a ni ang.