10 Ball Pool Ranking Tournament quarter-final khel zo

Mizoram Snooker & Billiards Association (MSBA) buatsaih Mizoram State 10 Ball Pool Ranking Tournament 2024 chu nizan khan quarter-final khelh a ni a, result tarlan hman a ni lo.
Chhuak hmasa lama tarlan tawh angin, he tournament hi race to 7 (frame 7 la hmasa sa chak)-in khelh a ni a, nizan dar 7 leh dar 8 khan match hnih ve ve awmin, table 1 leh table 3-ah an khel ve ve dawn a ni.
Zan dar 7 match hnihah Lalchhandama leh Chawngthanzamate’n table 1-ah semi-final luh an inchuh a, table 3-ah Lalsangzela leh K. Lallawmkima an inhmachhawn ve thung.
Zan dar 8 table 1-ah R. Lalthazuala leh Lalremruata Fanai intumin, table 3-ah Zonuntluanga leh B. Lalhruaitluangate an inhawlh ve bawk
Result tarlan tur la awm hmain an n match history tlem-a-zawng han tarlang ila.
Khatla South tlangval Lalsangzela hi kumin March 18-30 chhunga Mizoram State 9 Ball Pool Championship-ah khan champion a ni a; kumin vek May 20-25 chhunga khelh zawh tak Mizoram State 9 Ball Pool Ranking Tournament 2024-ah khan finalist (runners up) ni lehin, tah khan K. Lallawmkima leh R. Lalthazualate hi semi-finalist an ni ve bawk.
Kumtir January 23-27 chhunga ‘Mizoram State 6 Red Snooker Ranking Tournament 2024’ lamah khan Lalsangzela, Khatla South chu champion-in, Zonuntluanga (Tekawka), Electric veng chu pahnihna a ni.
K. Lallawmkima pawh hi March 29-April 2, 2022 chhunga buatsaih Mizoram State 6 Red Snooker Championship 2021-22 daih tawhah khan a lo champion ve tawh a ni.
Zonuntluanga pawh hi Mizoram Snooker Ranking Championship 2019 khan a lo champion tawh a, Mizoram Snooker Championship 2018 champion a lo ni tawh bawk.