16th FC-in VC-te anmahnia sum an hailuh theih a ngaipawimawh – RD&A minister

16th FC-in VC-te anmahnia sum
an hailuh theih a ngaipawimawh
– RD&A minister
16th Finance Commission chuan village council-te chu an mamawh inphuhruk thei turin mahnia sum an hailuh theih dan a ngaipawimawh hle tih Rural Development & Administration minister Prof. Lalnilawma chuan a sawi.
Thawhlehnia Khawzawla District Panchayati Resource Centre office leh hostel building a hawnnaah minister chuan, 15th Finance Commission hnuaia LAD tana kum thum chhung fund an dawn loh pawh kum khat chhungin an nawrchhuak tawh tih a sawi a. LAD Directorate of Local Fund Audit leh PHE inkara thawhhona a that vang a ni, tiin, 16th Finance Commission chuan VC-ten an mamawh inphuhruk thei tura mahnia sum an hailuh theih (own source of revenue) a ngaipawimawh tih a sawi a. VC member-te chu chutiang tur chuan ngaihtuahna seng turin a chah.
Village council-te thiamna leh theihna tihchakna atan training an neihna tur DPRC office leh hostel building tha tak din a ni chu lawmawm a tih thu a sawi a. VC-te an inthuam chak theihnan leh khawtlang tan tha zawka hna an thawh theihnan VC Act thar – The Mizoram (Village Councils) Act 2025 siam a ni tih a sawi a ni.
National Panchayat Award 2025-a Clean & Green Panchayat category-a India ram pumah Kawrthah North Village Council-in pakhatna a la chu lawmawm a tih thu RD&A minister hian a sawi a. Mizoram tungding tur chuan village council atanga bultan a ngai, tiin, VC-te chu an hmazawn theuha theihtawp chhuah zel turin a fuih.
DPRC office building leh hostel building sakna atan hian sawrkar laipui Ministry of Panchayati Raj RGSA atangin cheng nuai 100 ve ve dawn a ni a. Tender chhuah niin, building pahnih sa turin Zothan Consultancy Service Luangmual Aizawl thlan an ni. RGSA scheme hnuaiah VC engemawzat hnenah computer hlan a ni tawh a, pekchhuah tur a la awm bawk.