16th FC-in ZMCH hotute leh Falkawn VC an tlawh

16th FC-in ZMCH hotute
leh Falkawn VC an tlawh
Mizorama cham mek 16th Finance Commission member-te chuan Thawhlehni khan Zoram Medical College & Hospital (ZMCH) Falkawn an tlawh a. Health & Family Welfare minister Lalrinpuii leh secretary Sangchhin Chinzah bakah ZMCH hotuten an lo dawngsawng.
ZMCH director Dr John Zohmingthanga’n presentation a pe a, ZMCH din tan atanga tuna an thlen chin, hmasawnna tur la awm leh an mamawh a sawi.
Health minister pawhin 16th Finance Commission chungah beiseina sang tak an nei tih sawiin, ZMCH bakah Health & Family Welfare deparment kaihhnawih thil pawimawh tak tak an hnena an thlen chu Mizoram hmasawnna atana pawimawh ber ber an nih avanga ngaihpawimawh sak tur leh a tihhlawhtlin dan kawng ngaihtuahsak turin a ngen.
16th FC member-te hian ZMCH hmunhma fang kualin OPD, laboratory leh deparment hrang hrang an tlawh a; ZMCH hotute pawhin an dinhmun leh hmasawn theihna tur la awm ang angte a hmunah an lo hrilfiah a ni.
ZMCH an tlawh hnu hian 16th FC member-te hian Falkawna Bharat Nirman Rajeev Gandhi Sewa Kendra (BNRGSK) Hall-ah Falkawn Village Council hotute an kawm a, hetah hian 16th FC chairman Dr Arvind Panagariya chuan hoin LAD director Chauhnuna leh Falkawn VC member-ten an lo dawngsawng a ni.
Falkawn VC hotute chuan Mizorama village council 800 chuang awm zingah an hun chep tak kara tlawh tura an ni an rawn thlang chu Commission chungah lawmthu an lo hrilh a. VC inrelbawlna kalphung sawifiahin an tawnhriat tawh atangin Mizoram pum huapa VC-te mamawh leh hmasawnna tur bakah hmalak dan thar atana tha nia an hriat chu 16th FC hnenah hian an thlen a, sawiho a ni.