BENGAL INTHLAN: Congress-in candidate 284 puang
BENGAL INTHLAN: Congress-in candidate 284 puang
Congress chuan member 294 awmna, West Bengal assembly inthlan thawh hniha an party aiawha ding tur mi 284 a puang a, state president hlui, Adhir Ranjan Chowdhury leh Lok Sabha member hlui, Mausam Benazir Noor te pawh an tel.
All India Congress Committee (AICC) General Secretary K C Venugopal-a’n Pathiannia Delhi-a candidate a puanah hian hmeichhia 39, Scheduled Caste (SC) candidate 68 leh Scheduled Tribe (ST) 16 an tel.
Communist Party of India (Marxist) kaihhruai Congress leh Left Front chuan kum 2021-a assembly inthlanah khan tangrualin an chuh a; mahse, party pahnihin bial pakhat mah an la lo va. February thla khan Congress General Secretary i/c Bengal Ghulam Ahmed-a chuan Congress hian bial 294 chu thawhpui nei lovin an chuh vek dawn tih a sawi a ni.
Kum 1999 atanga Murshidabad district-a Berhampore Lok Sabha bial vawi nga thlan tlin lo ni tawh, Chowdhury-a hian kum 2024 inthlanpuiah khan Mamata Banerjee-i kaihhruai Trinamool Congress-in an dintir, Indian cricketer hlui, Yusuf Pathan-a a hneh lo.
Chowdhury-a hian state president a nihna atangin a bang zui a. Lok Sabha-a a bial thin chhunga awm, Berhamore assembly bialah tun inthlan hi a chuh leh dawn a ni.
Kum 1990 laihawl vela assembly inthlanpui a chuh hnuhnun ber ni tawh, Chowdhury-a chuan, “Congress sipai hlun ka ni a. Party-in ding tura min duh chuan ka chuh ngei ngei tur a ni,” a ti.
Noor-a hi kum 2009 leh 2014-a Congress hminga Malda North Lok Sabha biala thlan tlin tawh kha niin Malda district-a Malatipur bialah a ding dawn a. Kum 2019 khan TMC hmingin a lo chuh tawh a, BJP candidate Khagen Murmu a hneh lo.
TMC chuan Rajya Sabha member atana dah zui mah se January thla khan Congress-ah a kirsan leh a, parliament-a member a nihna atangin a bâng.
Congress-in West Bengal inthlana ding tur an telh zingah hian an hruaitu thi tawh, Somen Mitra-a fapa, state president ni rei ber zinga mi, Rohan Mitra pawh a tel a, South Kolkata-a Ballygunge atangin a chuh dawn a ni.