2006 WC final chungchangah Materazzi tawngchhuak

2006 WC final chungchangah Materazzi tawngchhuak
French legend Zine-dine Zidane-a hun tawp kharna 2006 World Cup final-a Italy a hma-chhawn boruak kha kan la mitthla fur theiin a rinawm a, khami tuma a lukawlh hmang ngei maia a tauhtluk Italian de-fender Marco Materazzi khan tunkar Thawh-lehni khan Germany rama thil thlen chhan a sawichhuak ta nge nge a, football khaw-vel titi a tling leh laih.
2006 FIFA World Cup-ah khan penalty petah Italy chuan 5-3-in France an hneh a; hun pangngai minute sarihna leka France hmahruaina goal khungtu Zidane chu minute 110-naah Italy tana goal thuntu Italian defender Marco Ma-terazzi a tauh avangin hnawhchhuah a ni a, a hnu lawkah professional football a chawlhsan thu a puang zui nghal.
Zidane leh Materazzi kha tawngkaa an inchhan hnu lawkah eng khaw sawi set set loin France legend khan Italian defender awmah a tauh a, football superstar hming tha tak thin khan a hun tawp lamah khawvel pumin a thlir thup laiin red card hmanga hnawhchhuah a ni a, khati taka France captain ropui chhaihkawlhtu tawngkam kha eng tak ni ang maw tih chu mi titi lian ber a ni.
A hun lai khan thawm thangva a tam a, Materazzi khan Real Madrid legend Zidane chu a nu nawhchizuar a nih thu a hrilh tihte a awm a, thu chiang erawh hriat tur a awm thei lo a, mi fate kamtam lohzia kan hmu!
Real Madrid head coach hlui Zidane chuan a thiltihah khan inchhirna a neih eih loh thu leh thupha chawi ai chuan thih a thlang zawk tih chanchinbu lamah chhiar turte a awm a, Inter Milan defender hlui thusawi hriat chakna a zual ting mai!
Tunkar Thawh-lehni khan IFTV Podcast lamah Materazzi chuan khami tuma Zidane nen an inbiak dan sawi-chhuakin, “|awngkam chuangtlai satliah mai mai maw le. Engmah a ni lo. A jersey min pek a tum a, kei chuan ka lo hnial a, a farnu ka duh zawk thu ka hrilh a,” a ti!
Tarlan tak angin, football khawvel chuan Materazzi thusawi kha a ngaihven a, hriat a chak a, Zidane-a nu a hmer tel a ni ang tih chu rin dan tlanglawn a ni a, mahse, a farnu chungchang zawk a ni a lo sawi ni.