Kum 2022-a African Swine Fever leng vanga he hri kai nia ngaih vawk suat sak chhungkaw 1847 tan zangnadawmna an dawn tur chu semchhuah phalna pek a ni a. Sem thuai tura bawhzui mek a ni. Hetihlai hian kuminah ASF vanga vawk thi leh he hri kai nia ngaih vawk suat belhkhawm chu 36971 a ni tawh.Nilaini khan AH & Vety department hian vawk suat (culled) avanga zangnadawmna semchhuah phalna a pe a. Tuna zangnadawmna pek tur kum 2022 chhunga vawk suat sak chhungkaw 1847 hnena pek tur niin, cheng nuai 263.32 a ni. Tun tuma sem tur hi vawk suat sak zinga zaa 25 an ni a, a bak zaa 75 hi hmuh leh thuai beisei a ni. Zangnadawmna hi district tina thuneituten an district theuhah an sem chhuak leh dawn a ni.
Tun tuma zangnadawmna dawng tur hi Aizawl district-ah chhungkaw 347, Champhai 490, Hnahthial 206, Khawzawl 14, Kolasib 24, Lawngtlai 386, Lunglei 37, Mamit 179, Saitual 18, Serchhip 59, Siaha 87, a vaiin chhungkaw 1847 an ni.
AH & Vety minister C Lalsawivunga chuan ASF hrileng kan tuar nasa hle a, dan leh dun tihfel hnu ah ‘state disaster’ a puan tumin hmalak mek a ni tih a sawi.
Vawk suat zangnadawmna hi kum 2025- 2026 chhung Assistance to State for Control of Animal Diseases Action Plan-ah telhin sawrkar laipuia dil tur a ni a. Compensation funding pattern hi 50:50 a nih avangin Mizoram sum tam tak a kal ral a. Hei vang hian 90:10 a tih sak turin dilna thehluh niin, hmarchhak state dangte nen inthurualin bawhzui tum mek a ni tih a sawi.
Hetihlai hian kumina ASF hri leng thawh thumna kal mekah Mizoram pumah he hri thihpui vawk 13836 an awm tawh a; he hri kai ngei nia ngaih suat vawk 23135 an awm a, a vaiin vawk thih phah tawh hi 36971 a ni. ASF leng hian khaw 245 a luhchilh tawh.
2022-a vawk suat zangnadawmna pe Kuminah ASF vanga vawk thi 36971
Get real time updates directly on you device, subscribe now.