Serchhip damdawi in sakna tur cheng vbch. 50 dawng fel tawh

Serchhip damdawi in sakna tur
cheng vbch. 50 dawng fel tawh
District Hospital Serchhip main building sakna tur cheng vaibelchhe 50 chu state sawrkarin a dawng tawh a, tender chhuah a, hna thawh chhunzawm thuai a ni dawn tih chief minister Lalduhoma chuan a sawi.
Serchhip bialtu MLA ni bawk Lalduhoma hian Nilaini khan Serchhip District Hospital-a Dialysis Unit thar a hawng a. Khawtlang hruaitute inpekna azarah dialysis khawl hawn a ni ta, tiin, tha taka hna a thawh theihnan mamawh dang la awm pawh ngaihtuah zel a ni dawn tih a sawi.
Damdawi ina thawktuten theihtawp chhuah a, Pathian rawngbawl an ni tih hre chunga thawk turin a fuih a. Natna khirh tuar, inenkawlna nei si lo an lokal pawhin lo ngaihsak hram hram turin a chah.
“Thawktute inthlahdah avanga damlote tawrhna thleng lo se, hah chung chung pawhin, nunna chhanna a nih avangin lo thawk hram zel ang che u,” a ti.
Mizo zingah HIV, cancer leh natna khirh tak tak vei kan tam ta lutuk chu duh kan thlang sual deuh em ni a tih theih tih Lalduhoma hian sawiin, “Natna tam tak kan pumpelh theih a awm a, kan nun kan uluk a tul. Pathian hian kan hrisel hi a phal a, kan hausak pawh a phal. Kan damna hi Pathian hnenah a awm a, kan thing leh mau leh nungcha pawh zalen se, mipui hrisel ila, Pathian malsawmna kan dawng zel ang,” a ti.
Serchhip District Hospital-a Dialysis khawl hi kum 2025-a an dawn tawh a ni a, thawktu – doctor 1, technician 1, staff nurse 2 leh RO incharge 1-in an enkawl dawn. Khawl pahnih hmangin, chawhmaah mi pahnih leh chawhnu ah mi pahnih zel an enkawl thei dawn a, chawlhkar khatah mi pakhat tan vawi hnih a tih theih ang. Sawrkar chawlhah leh thla tin Inrinni vawi hnihna an awl thin ang. Natna khirh bik Hepatitis leh HIV vei erawh a hranpaa enkawlna pek ngai an nih avangin dialysis hi an tih sak thei rih dawn lo a ni.
Dialysis khawl bunna senso atan hian MLA fund Rs. 15,04,000 leh technician hlawh tur Rs. 1,38,000 an dawng tawh a ni.