2023 Billboard Latin Music Awards-ah Peso Pluma a langsar

Regional Mexican music star Peso Pluma chu 2023 Billboard Latin Music Awards-ah langsar berin, award pariat a dawng a, chung zingah chuan award ngaihhlut artist of the year, Hot Latin Songs artist of the year leh songwriter of the year award te pawh a tel.
Peso Pluma award dawn zinga pali chu trio Eslabon Armado nena an thawh hona ‘Ella Baila Sola’ avanga a dawn niin, he hla avang hian Hot Latin Song of the Year pawh an dawng nghe nghe a ni.
Bad Bunny pawhin award a hum hawn nual a, award dawn tamah Peso Pluma dawttu niin, award pasarih a dawng a, chung zingah chuan tour of the year leh Global 200 Latin artist of the year pawh a tel a, a hla hit ‘Titi me Pregunto’ avangin award pahnih a dawng bawk.
Colombian star Karol G pawhin award panga dawngin, Peso Pluma leh Bad Bunny dawttu a ni a, a album Manana Sera Bonito avangin award pahnih a dawng a, he album hi Billboard 200 (albums) chart-ah No.1 kaiin, hmeichhe zaithiam zinga Spanish hla hlang awmna album he chart-a No.1 pui thei hmasa ber a ni nghe nghe. Karol G hian Latin Rhythm Album of the year, Hot Latin Songs artist of the year (female) leh top Latin Albums artist of the year (female) a dawng bawk. Hei bakah hian Spirit of Hope Award hlan a ni bawk a, he award hi Con Cora Foundation kaltanga a hmeichhiatpui te tana a thilphalna avanga hlan a ni.
Billboard Lifetime Achievement Award chu Mexican cumbia act Los Angeles Azules-in an dawng a, Icon award chu reggaeton pioneer Ivy Queen hnenah hlan a ni ve thung.