Formula 1 world championsip season thar atan team hrang hrang an insingsa kal mek a, tun dinhmuna 2023 Formula 1 car design tlangzarh hmasaber chu Alfa Romeo niin, Thawhlehni khan kumina an car hman tur C43 design chu Switzerland ramah an phochhuak.
-- Advertisement --
Switzerland rama inkulh he team hian nikum khan hmasawnna hmel hmuin, 2021 championship-a pakuana kha nikumah parukna an kai chho a; kumin hi Alfa Romeo tih hming pu chunga intlansiak an hmachhawn tawpna a ni tawh ang.
An driver innghahna pui ber ni leh tur Valtteri Bottas chuan hlawhtlinna sang zawk an mamawh tih sawi chungin tum sang zawk an neih a tul thu a sawi a, point tam zawk hmu turin nghet mar zawka an kal theigh a beisei thu a tarlang tel.
Kumina an car hman tur model khuhhawngtu hi an lead driver Bottas leh a team-mate Zhou Guanyu niin, Thawhlehnia an phochhuah hi chu intlansiak tak taka hman tur ni lo, hun chhuah atan mai maia siam (show car) niin, hetiang chiah car (2023 design)-te chu nimin Zirtawpni leh Inrinni vawiin hian Circuit de Barcelona-Catalunya tlankawnga two-day test-ah a vawikhatna’n an khalhchhuak mek a ni.