2024-a Presbyterian Puitling Sunday School zirlaibu tichhuak

Mizoram Presbyterian Kohhran chuan kum 2024-a Puitling Sunday School zirlaibu tur a tichhuak.
Kum 2024 hian Mizoram Presbyterian Kohhran chuan Puitling Sunday School-ah “Isaia Bung 40-66 Hrilhfiahna” tih an zir dawn a. He zirlaibu hi Presbyterian pastor-te zinga mithiam, Rev Vanlalnunmawia Zawngte ziah a ni. A ziaktu hi tawnhriat ngah tak, Mizoram chhung leh pawn hmun hrang hranga pastor hna thawk tawh leh Manipur Mission Field-a field secretary ni tawh a ni. Zirlaibuah hian zirlai 46 awmin phek 270 a chhah a ni. Mizoram puma Synod Bookroom dawr zawng zawngah lei theih tura chhawpchhuah a ni a, a chhut man Synod-in 25% a subsidised avangin Rs. 120 a lei theih a ni ang.
Kumthara Mizoram Presbyterian Kohhran Puitling Sunday School zir tur; Zawlnei Isaia lehkhabu hi Puitling Sunday School zirlai atan tum li – 1947, 1948, 1961 leh 1973-ah hman a lo ni tawh a, nakum hi tum nga zirna tur a ni.
Presbyterian Kohhran Puitling Sunday School zirlaibu hi Mizo lehkhabu malkhaiah chuan copy chhutchhuah tam ber a ni thin a. Kum 2024 atan hian copy 90000 chhut a ni.
Mizoram Presbyterian Kohhran Puitling Sunday School zirlaibu hi Mizoram Synod hnuaia kohhran zawng zawng zirlaibu a nih bakah Presbyterian Church of Myanmar (PCM) hnuaia Phai Synod pumpui chuan an zirlaibu atan an hmang ve nghal zel a. Presbyterian Church of Myanmar leh Mizoram Synod partnership agreement angin Mizoram Synod hian kumtin copy 1000 a thlawnin Presbyterian Church of Myanmar hi a pe thin a ni.
Puitling Sunday School zirlaibu bakah hian Naupang Sunday School department hrang hrang zirlaibu tur peihfel a ni tawh a, tun atanga rei vakloah 2024 Nilai Leh Beihrual Thupui Bu leh Synod Calendar thar chhuak leh tura beisei a ni bawk.