2025 Suzuki Access 125 Aizawl-ah tlangzarh

2025 Suzuki Access 125 Aizawl-ah tlangzarh
Mizorama lirthei hralh kal bera chhal ngam, Suzuki Access 125 chu Bharat Mobility Global Expo, Delhi-a neihah January ni 17 khan an tlangzarh tawh a, Mizorama Suzuki dealership LBS Suzuki chuan Inrinni kalta khan Millennium Centre tualah Aizawl-a zawrh chhuah tan turin an tlangzarh ve leh ta. LBS Suzuki hi Mizorama scooter hralh chhuak hnem ber an nih ngei a rinawm a, Suzuki brand two wheeler hrang hrang zingah pawh Suzuki Access 125 hi an hralh chhuah tam ber niin, Mizoram-ah 40,000 chuang an hralh tawh a ni. 2025 Suzuki Access 125 hi LBS Group Board member Joseph Lalthanpuia leh Info Bikes chief test rider Vanlalmuana’n Mizoramah khuh hawngin mi 10 hnenah an pe chhuak nghal a ni.
Muantea chuan, “2006 khan India ramah Suzuki-in Access 125 a tichhuak a, a hlawhtlinpui viau rualin Mizoramah hralh a kal em em a ni. A hlawhtlin chhan chu a zuartu LBS vang a nih bakah a pianhmang a lerh lo va, tute pawh mil turin rawng hran hran a awm a, engine a tlovin kawng chhova inphurh nan mi a zo tha a, petrol a ei na lo hle bawk a ni,” a ti.
November 30, 2014 khan Bawngkawn, Aizawlah LBS Suzuki showroom hawn a ni a, June 2000 thlengin Access 21,000 an hralh chhuak hman. Kum eng emaw zah kal ta atangin Mizorama lirthei hralh tam ber an ni a, thla khatah chawhrualin 700 atanga 800 vel an hralh a, heng zinga 80% hi Access a ni.
Muantea chuan Mizo mipuiin an duh em em Access chu changkang leh tha zawkin an thuam a, tuna a chhuak thar hi ‘a seat a sei hret a, a hma aia a ruh hret avangin rei tak chuan nan a nuam zawk’ ti a sawiin, “A pianhmang pawh an tidanglam a, a hma aia zen zawk a nih avangin a hnunga chuan a nawm phah.
“A ke hma leh hnung inhnaih zawka an siam avangin khalh leh kual a nawm phah a, a chhuata gas bur leng sa tawh kha an tilian leh zual a, a hma aiin a headlight a eng a, petrol litre 5 thun theih thin kha 5.3-in an tilian bawk.
“Pawimawh em em chu brake fail awm thei tawh lo turin a thunun nan khawl lian tha zawk an hmang a, engine tlo tha tak ni sa mah se a aia chak leh changkang zawk a hmang bawk. Kawng hrang hrangah a hma aia tha zawk tur zela thuam a ni a, a that loh zawkna lai tur hmuh thiam a har hle a ni,” a ti.
2025 Access 125 hian 125 cc single-cylinder, air-cooled engine neiin, OBD-2B emission norm pha a ni a, Suzuki Eco Performance (SEP) technology hmang niin, 8.31 bhp @ 6500 rpm leh 10.2 Nm torque @ 5,000 rpm pechhuak thei a ni a, a model hmasa te aiin petrol a heh lo zawk niin an chhal bawk.
A design-ah tih danglam an nei a, chrome headlight visor leh tail lamp thar neiin, a hmalam chabi herhna atangin a fuel lid a hawn theih a, a seat hnuai thil dahna an tizau sawt a, a fuel tank a dawng hlawk hret bawk. A suspension layout pawh an tithar a, a seat a sei zawk bawk. A safety lamah passing switch, hazard switch te an dah thar bawk.
A Bluetooth-enabled Multi-Function Digital Instrument Cluster-in feature thar a neih belh zingah calendar Alerts, rain alerts te awmin Suzuki Ride Connect app a support a, he app kaltlang hian scooter khalhtuin khawchin awmdan te, scooter servicing tih hun te, petrol a hman dan te a hriattir thei dawn a ni.
A man erawh a chhuak hmasa nen a inang deuh reng a, Rs 1,18,867 (on-road price)-in a lei chhuah theih. Combustion engine hmang bakah hian Suzuki chuan battery hmang electric Access an tichhuak bawk a, LBS chuan Mizoramah March velah hralh chhuah hman an inbeisei.
LBS chuan Suzuki two-wheeler dealer an nih atanga January 2025 thleng, kum 10 leh thla hnih chhungin Access 40,000 chuang an hralh tawh tih an sawi a, Mizoramah hetiang taka lirthei model pakhat zinga hralh chhuah hnem a awm lo. Chutihrualin Mizoramah mi nuai 13 vel cheng anga ngaih a ni a, chawhrualin mi 32 zelin Access pakhat intawm anga chhut theih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More