2026 Golden Globe Award Nominations-ah ‘One Battle After Another’ & ‘The White Lotus’ langsar

2026 Golden Globe Award Nominations-ah ‘One Battle After Another’ & ‘The White Lotus’ langsar
January ni 11, 2026-a sem tur, 83rd annual Golden Globe Awards chu nomination an puang ta a, film lamah ‘One Battle After Another’ langsar berin, nomination pakua a nei a, ‘Sentimental Value’ (8), ‘Sinners’ (7), ‘Hamnet’ (6), ‘Frankenstein,’ (5) leh ‘Wicked: For Good’ (5) ten an dawt. Television lamah ‘The White Lotus’ a langsar ve thung a, nomination paruk a nei a, ‘Adolescence’ (5), ‘Only Murders in the Building’ (4) leh ‘Severence’ (4) ten an dawt.
Tun tumah hian category thar best podcast an telh thar a, podcast category hi Critics Choice Award nomination-ah pawh a vawi khat nan an telh thar tawh bawk a, award hrang hranga pawh podcast lam hi an telh deuh zel tawh dawn niin a lang.
Cynthia Enrivo leh Ariana Grande te chu ‘Wicked: For Good’ avangin nomination-ah an lang a, an pahnih hian nikum khan ‘Wicked’ film-a an performance avangin Golden Globe-ah hian nominate an lo ni tawh bawk. ‘Wicked: For Good’ hi cinematic leh box achievement award-ah nominate a ni a, nikum khan he award hi ‘Wicked’ film-in a lo dawng tawh bawk.
KPop Demon Hunters chu animated feature-ah nominate a ni a, a soundtrack ‘Golden’ chu best original song-ah nominate a ni bawk a, best original song-ah hian ‘Wicked: For Good’ atangin ‘No Place Like Home’ leh ‘The Girl in the Bubble’ te nominate an ni bawk a, anni hi rinkai pawl niin, Oscar pawh beisei thei tura ngaih deuh an ni.
Selena Gomez chu ‘Only Murders in the Building’ avangin a tum li nan Golden Globe-ah nominate a ni a, tum thum nomination-a a lan tawhnaa award a la dawng lo a, kumin chu a vanneih kum a ni thei tawh mahna!