2028 MLA inthlanah PLRS

2028 MLA inthlanah PLRS
Kum 2028 MLA inthlanpuiah Mizoramah party sawrkar siam tawh loin, Pathian Lal Ram Sawrkar (PLRS) siam turin mipui an sawm tih Zoram Thar chuan an sawi.
Zoram Thar Zofate Lairelna Inpui ziaktu lian Lalruatfeli Hlawndo chuan, Zofaten pi leh pute hun atanga rorelna felfai tak – lal leh upate hmanga khawtlang rorelna kan neih duh loin, kum 1946 atangin milem biate tih danin party politics kan din tan a. Kum 80 chhungin political party 23 chuang a ding tawh tih a sawi.
Chu party politics chuan Zofate zingah indona nasa tak a siam a, Zonun zemawi a thiat a, Zofate Kristianna leh Bible zirtirna nen a inkalh tlat avangin kan Kristianna leh party politics a indo a, loh theih lohin keimahni leh keimahni kan indo ta tih sawiin, “Milem biate tih dana rorelna hian kan thlarau, rilru leh taksa a eichhia a, duhamna milem biakna in kan ram a luahkhat a. He milem biakna hmanga rorelna tawp hun a thleng tawh dawn. Pathian chhungte zingah rorelna tan a hun tawh a, Zofate kan saltanna atangin Lalpan min hruai chhuak dawn tih kan ring,” a ti.
Party sawrkar ni lo, Pathian lal ram sawrkar a ding thuai dawn tih an beisei tih a sawi a. Kum 2028 inthlanah party sawrkar ni tawh loin, Lalpa Chhiahhlawh Intelkhawmte hmangin Pathian Lal Ram Sawrkar (PLRS) a pian ngei an beisei a. Lalpa chhiahhlawh hna thawk tura kohna dawngte lo pen chhuak tawh turin an sawm tih a sawi a ni.