2029-ah venhimna thil Rs. vbc nuai 3 man siam chhuah tum

2029-ah venhimna thil Rs. vbc nuai 3 man siam chhuah tum
Defence Minister Rajnath Singh-a chuan sorkarin kum 2029-ah chuan ram venhimna thil Rs. vaibelchhe nuai thum man siam chhuah a tum thu a sawi a, hetih hunah hian ram danga a thawn chhuah pawh Rs. vaibelchhe 50,000 man a tlin theih an beisei tih a sawi.
Thawhlehnia Dehradun, Uttarakhand-a hun a hmannaah kum zabi 21-naah hian information warfare hman a nasat tawh thu sawiin mipuite pawh dawt, titi leh khawtlang thatna tur thehdarhna kawngah ‘social soldier’ ni turin a chah.
“Data leh information hi tunah chuan thiltihtheihna chak ber leh hmachhawn hautak a ni tawh a. Operation Sindoor lai pawh khan Pakistan chuan kan sipai leh khua leh tuite tihhnual nan video lem, chanchinthar phuah belh leh thu tar lan an uar hle a ni,” a ti.
“Sipai chakna hmanga inbeihna a tawp hnuah pawh information hmanga indona chu a kal zel dawn a. Miin ngaihtuah chiang lova thu dik lo a thehdarh chuan ama inhriat miah lohvin hmelma tan hmanrua a ni thei a ni,” tiin defence minister chuan a sawi.
Singh-a chuan India hian ramri ven chauh a tum lo va, kalphung tha siama tum mumal neiin, eibar dinhmun leh thiamna lamah pawh hmasawnna thlen a tum tih a sawi.
“Tun hma kha chuan ram venhimna hmanruaah ram dangah kan innghat vek thin a, tunah erawh chuan India hi ram venhimna hmanruaah ‘mahni kutkawih’ tiin a kal chak hle tawh a ni,” a ti.
Sorkarin firfiaka chetna a dona leh ram himna tur a ngaihtuahnaaah ram venhimna hmanraw siam chu ‘Mahni kea ding India’ ni tur a ban pawimawh a nih thu a sawi a. “Operation Sindoor-a hmanrua leh platform hman zawng zawng kha India-a siam a ni,” a ti.
Ram venhimna lama sum hman tur pawh nasa taka tihpun a nih thu sawiin kum 2014-a Rs. vaibelchhe 40,000 ni thin chu tunah chuan Rs. vaibelchhe nuai 1.30 a ni tawh tih sawiin ram danga ram venna hmanrua thawn chhuah pawh kum 2024-25 chhunga pungin Rs. vaibelchhe 23,622 man a tlin thu a sawi.
India siam ram venhimna hmanruate chu ram 100 dawnah thawn chhuah a nih thu a sawi bawk.
“Kuminah hian Rs. vaibelchhe nuai 1.75 man siam chhuah kan tum a, kum 2029-ah chuan Rs. vaibelchhe nuai thum man siam tum a ni a. Kuminah hian kan thawn chhuah chu Rs. vaibelchhe 30,000 man a ni a, kum 2029-ah chuan Rs. vaibelchhe 50,000 a tlin tawh beisei a ni,” a ti.
Ramin ram venhimna kawnga sum a dah pawh tihpun zel niin kum 2013-14-a Rs. vaibelchhe nuai 2.53 ni chu 2024-25-ah chuan Rs. vaibelchhe nuai 6.22 a nih tawh thu a sawi a. Heng zinga 75% chu ram chhung company-te chan tura tih a nih thu a sawi bawk.
“Tunah hian Indian sipaite hian kan siam hmanrua, missile, tank leh thil dang kan hman tawh a. Kan siam chhuah missile – Agni, Prithvi leh BrahMos te chu hmelma chhang let turin a inpeih reng tawh a. Aircraft carrier-te pawh thuam that mek a ni,” a ti.
Singh-a hian chanchinbute pawh tunah chuan ‘a chhuah hmasa’ nih aia ‘a dik chhuah’ ngai pawimawh zawk turin a sawm a. “Chanchinbu khawvelah ‘a darh nasa’ tih aiin ‘finfiah ngei’ tih chu a dinhmun a sang zawk a, hetiang hi chu kan kal pelh a ngai a ni,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More