2036 Olympics hmathlir bul tan Sawrkar policy-ah hmang dawn

2036 Olympics-a Mizoram infiammi a tam thei ang berin ram ai an awh theih nana hmalak bul tanna – Mizoram Sports Conclave chu Ningani khan Aizawlah neih a ni a. A hawngtu chief minister Lalduhoma chuan he hmathlir hi state sawrkar ‘policy’ a hman a nih tur thu a sawi.
Chief minister chuan Mizote tan infiamna chu khawtlang nun phuarkhawmtu leh tanrualna atana hmanraw pawimawh a ni hrim hrim sa tih sawiin, a bikin Mizo mipuiin football an tuipui zia a sawi. State sawrkar chuan football chauh niloin, Olympic-a infiamna telh hrang hranga sports association-te nen a bulthut, grassroot atangin an bei chho tak tak dawn a, state sawrkar chuan Vision 2036 Olympics hi policy pakhatah a nei dawn tih a sawi a ni.
“Hemi atan hian state sawrkarin a tih thei chin ang zawng zawng chu kan ti dawn,” a ti.
Sports minister Lalnghinglova Hmar chuan, Vision 2036 Olympics-a an tum bul ber chu, Mizoram hmun tin atangin infiamna lama mi bik zawnchhuah leh chher hriam a ni tih a sawi a. State sawrkar programme – Bana Kaih Policy hnuaiah infiammite tuaihriam turin coaching an mamawh ang an hmuh theih dan tur duan a ni dawn a, sawrkar ngawtin kalpui loin, public- private partnership mode-in infiammi chher turte hi, Olympic 20235 thlir chunga dap khawm an ni dawn tih a sawi a ni.
Mizoram Sports Conclave hawnnaah hian minister Dr Vanlalthlana bakah Assam Sports minister Nandita Garlosa, Meghalaya Sports minister Shakliar Warjri, Indian Olympic Association CEO leh All India Football Federation president ni bawk Kalyan Chaubey bakah sawrkar hotu dangte an tel a. Sports association hruaitute leh infiamna tih hmasawnna kawnga thawktute an tel a ni.