210 degree-a a kephah tivirin record siam

I kephah kha hnunglam i hawi tir em? Brazilian Renato Bayma Gaia chuan a kepha pakhat zawkin hmalam a hawi laiin a pakhat zawk chu hnunglam a hawi tir thei a, Guinness World Record a siam. A record siam chu kephah tivir kual nasa thei ber record a ni a, 210.66 degree-in a kephah dinglam a tivir a, a hmaa hetiang record chu 28.63 degree-in a rawn khum ta a ni.
Renato hian a kephah hetiang hian a tivir thei hi kum 30 kalta khan a hrechhuak tawh a, “Ka inzir pawh a ni hran lo, ka pianpui a ni,” a ti Renato hi hriat theih chinah kephah 180 degree chuanga a tivir thei awm chhun a la ni.
Guinness guidelines-ah chuan record siam tumte chuan an kephah chu a pahnihin hmalam an hawi tir ve ve ang a, chutah a pakhat zawk chu an tivir tur a ni a, an keartui erawh an tiche tur a ni lo va, a awmna ngaiah a awm reng tur a ni. Hetianga an kephah an tivir lai hian kut emaw thildang emaw engmah a pui tura hman theih a ni lo va, taksa chunglam pawh a inher ve tur a ni lo. Chutianga an duhtawka an kephah tihvir hnuah chuan second 10 tal a position ngaiah a awm ngei bawk tur a ni.
Renato hi Guinness World Records-ah a mikhual tawh bik lo va, nikum khan minute khat chhunga lei (tongue) hmanga hnar (nose) liak hnem man ber record siamin, vawi 334 a liak hman a, hei bakah hian a lei hmangin Jenga block panga cu second 7.38 chhungin a tisawn hman a, Jenga block panga lei hmanga tisawn rang thei ber record a siam tawh bawk.