February 8-10, 2023 chhunga Ramhlun Indoor Stadium, Aizawl-a khelh Robula Chess Trophy-ah Lalbiakmawia, Farkawn a champion.
Mizorama chess tournament upaber Robula Chess Trophy hi kum 1978 atanga khelh tan niin, kum tina khelh chhoh thin a ni a, kumin hi a tum 43-na niin, Ramhlun Indoor Stadium-ah Mizoram hmun hrang hrang atangin chess khel thiam mi 72 an fuankhawm.
-- Advertisement --
A pumpuia pakhatna Biakmawia hian point sarih hmuin, champion trophy leh certificate bakah tangka fai Rs. 25,000 a dawng a; point 6.5 hmua pahnihna hauhtu Stephen MS Tluanga, Tlangnuam kutah certificate leh Rs. 15,000 lutin, point 6.5 bawk hmua pathumna dinhmun luah Lalawmpuia, Bethlehem Vengthlang chuan certificate leh tangka fai Rs. 10,000 a hlawh ve bawk.
Tournament Director hi MCA president Dr. Lalhmuchhuaka niin, Chief Arbiter Micky Lalmuanpuia (NSA) leh Deputy Arbiter K. Lalrosiama (SA)-te nen hneh takin game an enkawl a, kum dang ang bawkin he tournament hian chess ngainatute ngaihhlut a hlawh leh.
He tournament hi Swiss system a khelh niin, 8 Rounds khelh a ni a; khelh hun chhung hi 60+60 with 10 second increment a ni.
Tie Break ah hian – Direct Encounter, Buchholz cut- 2, Buchholz cut 1, Greater numbers of victory leh Sonne borne Berger-te hman a ni.
Player chhuak zinga naupang ber Harper Lalthlamuani Colney (Bungkawn) kutah Youngest trophy a lut a; player upa ber Dr Lalhmuchhuaka (Ramhlun North) chuan Most Senior trophy dawng-in, Best Unrated-ah Lalruatfela Sailo (Mizoram Police) an thlang a, Best Dress trophy dawngtu chu Zakima (Venghlui) a ni.
Inelna pui ber bakah age category leh special award hrang hrang lawmman siam a ni a, lawmman chi hrang hrang dawngtute kan han chhawpchhuak e.