Mizote luah chin ram, Assam lamin an enkawl hawh Inner Line 509 suare miles chu lalet turin Supreme Court thlen an tum tih Zofa Welfare Organisation leh Joint Action Committee on Inner Line Reserved Forest Demand chuan an sawi.
Thuthar thehdarhtute hnena an sawi danin, British sawrkarin India a la awp lai, Mizoram (Lushai ram) chhung square mile 509 chu Mizoramah puang telin, Cachar Forest (Assam) enkawl lailawk turin a dah a, he inner line reserve hi Assam Gazette, 1877 March 17-a tihchhuahah tarlan ni a. Hei hi tun thlengin Assam sawrkar hian Mizoram kutah a la pek kir loh avangin, dil let a, a tul anga Supreme Court thlen an tum tih an sawi a ni.
Hma lak an tumna hian Mizoram leh Assam sawrkarin ramri chungchanga an inbiak mekna chu a dal hran loa, thil hrang ve ve anga kalpui theih a nih avangin, an ni pawhin he hmalakna hi an chhunzawm ta zel tih an sawi bawk.
Square mile 509 huamchhungah hnamdang (Vai) thahnem tak an chen tawh avangin, neih let leh kher tul ti lo an awm thei tih JAC on ILRFD hruaitute chuan sawiin, forest reserved a nih angin, hemi chhungah hian chen mihring chen leh inbenbel phal a ni loa, Assam sawrkar pawh hian a hnawtchhuak fo thin tih an sawi.
Helai hmun nei let leh tur hian document leh tanchhana hman theih, thuziak hrang hrang an lakhawm a, an nei tha thawkhat tawh tih JAC hruaitute chuan an sawi a. Lakkhawm theihna awm ami pawh an la dap zel tih an sawi bawk.
Hemi chungchangah hian Supreme Court judge hluite pawh an berawn tawh a, Mizoram ta a nih angin laklet theih ngei an inring a, Mizoram a ni tih chu keini ai mahin India sawrkar leh Assam sawrkar pawhin an chiang zawk tih an sawi. Supreme Court kalna man hi a hautak em avangin tunah hian mi thahnemngai leh inphalte tan sum thawhkhawm theihna an hawng mek tih an sawi a ni.
509 sq. miles la let turin Supreme Court-ah thlen tum
Get real time updates directly on you device, subscribe now.
Prev Post