MZP-in HSLC-a Mizo titha chawimawi Hnam rilru pu thangthar an pung – CM

High School Leaving Certificate (HSLC) result tihchhuah taka top 10-a tling Mizo zirlaite chu Mizo Zirlai Pawl chuan an chawimawi.
Mizoram Board of School Education-in HSLC 2023 result a tihchhuah top 10-a Mizo tlingte chu Nilaini khan MZP hian an chawimawi a. He hun hmanpuitu chief minister Zoramthanga chuan thangthar zingah hnam rilru an pung chho zel nia a hriat thu sawiin, “Khawvel hriata Mizote phochhuaktu pawimawh tak chu Mizo hnam leh ram hmangaihna hi a ni a. Ram leh hnam hmangaihna chu uar zawkin kalpui zel ang u,” a ti.
Zohnahthlak hnam hrang hrangte inunauna leh inpumkhatna atana MZP hmalakna fakawm a tih thu a sawi a. MZP-in ‘Zofest’ a buatsaih thin chu lawmawma a tih thu a sawi. Zohnahthlakte chu tlang dang leh mual hrang hrangah awm mah ila, Mizoram chu Zofate ‘Jerusalem’ a ni, tiin, hnam anga dingchhuak zel thei turin Zofate tan la thar turin a sawm a ni.
HSLC topper-te chu tuna an hlawhtlinna duhtawk mai loa, zirna sang zawk an zir hunah theihtawp chhuah zel turin chief minister hian a fuih a. Chawimawina hlante leh zirlai dangte pawh theihtawp an chhuah chuan Mizoram mai nilo India ram pumah pawh a ber thleng phak an ni thei tih a sawi. Eizawnna kawng zawhnaah tuina, thiamna leh theihna a inan vek theihloh thu sawiin, “Eng kawng pawh zawh ila, mi tangkai ber ni thei tura inzir leh thawhrim a pawimawh hle,” a ti.
Zu leh ruihhlo laka fihlim tum turin zirlaite a chah a. “Zirlai tan phei chuan taksa bakah rilru leh ngaihtuahna tichhe theitu a ni a, sang tak thleng thei kha hniam taka dahtu a nih avangin tlansan ngam a ngai,” a ti. Zu leh ruihhlo chuan khawtlang nun a tiralmuang loa, nu leh pa tan mittui tlakna thlen fo tu a ni tih hria a, ruihhlo ti lo tur leh huaisen taka hmalam pan zel turin a fuih. Zirlaite chu ‘talent’ an neih ang angte hmangthiam turin a fuih bawk.
Zirlai titha chawimawite hi thuziak leh sumfai Rs. 5000 bakah thilpek dangte hlan an ni.