EMAW MIN TI A

By Reuben Lalnunthara Hnamte
Mi tam zawk hian kan damchhung rei lo teah hian vawikhat tal chu ‘emaw min ti a’ tih hi kan tawk ve chawk maithei a. Kei pawh hetiang hun hi ka tawng zauh zauh thin. Vairengtea ka awm laiin vawikhat chu India sipai training-na hmunah ka kal a, gate-a ka lut tur chu gate duty sipai chuan a silai nen rithuai khawpa khawng hian salute min lo pe chu ka phu deuh zawk a ni. Sipai lal ve deuh hmuhin min hmu a ni maithei a ni. Min han hrechiang se chuan min salute dawn loh nen ti rilru chungin ka nui tat tat a. Aizawlah pawh hian chutianga salute chu ka tawk leh zauh thin, a chhan ber chu ..emaw min tih vang a ni. Emaw in tih hain a thalam te a chhe lamte, a nuihzatthlak zawngte hian a thleng chawk thin. Aizawl khawpuiah pawh hian Traffic police emaw in ti tlat te, police lal emaw inti tlat te kan neih nawk hi.
Hman deuh pawh khan hel hovin an hren America sipaiin an chhanchhuah khan, an mihren zinga tlangval pakhat chu hel ho zinga mi emaw tiin an kaphlum der mai a. Mi lar kan ngaihsan deuh te .. emaw min ti se ti ni awm taka an inchei dan leh an awm dan lo copy viau ta te pawh hi sawi tur an awm nawk a. Emaw tih chu a tak a ni lo tih a chiang nghal a, emaw tih ai chuan a tak kha a pawimawh ber. Mizote hi kan lo changkang zel a, khawvel tukverhah kan dak ve thei ta in, second rei lo te chhungin internet hmangin khawvel kan fang chhuak thei deuhthaw tawh a. Ramdang inchei dan, awm dan phung te kan hmuin kan hre tawh hle. Thawkkhat lai phei kha chuan thalaite hian Sap ngaihsanna leh nih chaknate kan nei nasa ni hian a lang a, an incheina leh awmdan kan la nasa a. Chutah khawchhak lam ngaisang lehin inti Korean fe fe kan kat nawk thin a ni.
Mizo nia lo piang kan nih avangin mizo taka kan awm hi hnamdang zingah pawh kan mawina leh zahawmna a ni. Mi tihdan la (copy) reng renga khawsak ai chuan mahni nih dan(original) hi a hlu ber. Sap hote leh hnamdangte pawh hian an awm dan lak (copy)ai chuan an zinga mizo taka kan awm hian min ngaisang zawk ngeiin a rinawm. Sap emaw, khawchhak lam mi emaw nia min hmuh ai chuan kan mizo nihna, tlawmngaihna, aia upa zah te hi vawng nung reng ila, keimahni leh kan hnam tan a mawi zawk a ni. Sap tawngte pawh hi kan pianpui tawng a nih loh miau avangin sap ho anga lam tum kher pawh hi a tul ber lem lo maithei. Chhiat ni that ni thuah pawh mizo taka kan insawngbawl hi a hlu em em a ni. Mizo ni si, chhiatni that ni thua mizo tih dan zawm tha duh miah lo te thleng hian an awm tawh a nia. Eng ang pawhin changkangin hausa pawh ni ila, kan hnam tih dan kalsan a, mi hnam tih dan lak(copy) kher hi a tulna a awm hran lo.
Milian leh hausa mi lehkhathiamte hlei hlei an han mizo pa/nu viau mai hi an ngaihsanawm em em thin. Israel ho pawh kha Babulon sala an tan laite pawh khan an hnam tih dan hi an vawng nung reng a, an zahpui hauh lo. Hnamdang tih dan lak hi hnam ralna pakhat a ni a. Israelte pawh khan Babulona sal an tan lai khan hnamdang tih dan kha lo la viau mai se chuan an hnam hi a ding chhuak ang em hriat a ni lo. 1948-a Independence an hmuh hma daih pawh khan khawvel hmun hrang hrangah an awm darh a, mahse, an hnam tih dan an chhawm nun zel avangin huat pawh an hlawh a. Hitlera pawhin maktaduaih ruk zet a tihlum a nih kha. Nimahse, tunah chuan hnam chak leh changkang tak an lo ni ta a nih khu. An hnam dan leh sakhua an vawn nghet tlat avangin tunah chuan hnam chak tak, khawvel mi te thlir leh, thenkhat phei chuan an ngam loh an lo ni ta hial a ni.
Khawvel khawi hmunah pawh awm ila, mizo taka kan awm leh kan fa te thlenga kan zirtir hian kan mizo nihna a ti hlu in, a ti mawi em em a ni. Zaithiam ho pawh hian mi zai dan la (copy) a an zai ai chuan anmahni zai dan(original) ngeia an zai hian ngaihsan an hlawhin an hlu zawk thin. Kan nihna (orginal) ngei anga lan hi mi tih dan lak(copy) ai chuan a hlu zawk hle. Kan mizo nihnaa pianpui tawng mai ni lo, tlawmngaihna leh aia upa zahthiam hian nun dan mawi leh tha engkim hi a huam vek a. Kan Bible-in nun dan tur min zirtir nen pawh a inzul hle bawk. Kan mizo pi leh pute kha an lo rilin, an lo fing takzet a; tun thleng hian kan pi leh pu te thusawi tam tak hi thil thleng dik leh zawm tlak tak a la tam hle. Lehkhathiam an ni lo na a, an lo ngaihtuah chikin an lo ril hle a ni. Kan mizo dan taka kan aia upate kan han in U thin te, chhungkua leh laichin te kan inkoh thin dan te hi thalai tam tak chuan an zahpui deuh em ni aw ka ti thin. Abikin sap hote khu chuan naupangte pawhin pitar/putar pawh an hmingin an ko mai khu a nia, mizo tan chuan mak han tih mai tur a ni. Mahse, mizo taka kan inkoh hi a mawiin a hlu hle tih hriat a tha khawp mai. Mizote kan inlaichinna tha, kan inpawhna, tlawmngaihna leh aia upa zah te hi hnamdang pawh hian an awt em em zawk a ni.
Incheina chungchangah pawh hnamdang celebrity te inchei dan an lak thin avang hian kan incheina hi a san phah a, mi rethei deuh tan chuan biak in inkhawm thlengin inthlahrunna tur a tam ta. Sap ho meuh pawh khu, mipui vantlang incheina khu a sang miah lo a ni. Inneih sawngbawl thuah pawh hnamdang celebrity tih dan kan entawn avang hi nge, dan khatnaa inneih phei chu a hautak rem rem khawp ta mai. Mi retheite tan phei chuan inneih sawngbawlte hi tih ngam rual a ni ve lo tih mai tur a ni. Sap kan han tih ho mi vantlangte khu chuan, thiantha tlem nen, zingkarah tee maw an innei mai a, hautak lo deuhin an zo mai. Keini ramah zawng Aizawl khawpui a dan khatna ngata innei tur phei chuan a tlem berah nuaih nga atanga nuaih sawm sen a ngai tawh. He lai hi chu chhungkua leh mimalte pawh a hautak lo zawnga tih ngam hi ava tul em! A pawimawh berah chuan mi te’n ..emaw min tih emaw, lemchanna hmun tlansanin a tak tak (original) hi i ngaihlu ila, i dah pawimawh ber mai ang u. Hnamdangte hian Christian dik tak leh ringtu tak niin min min hmu se la; kan missionary-na pawimawh tak a ni ngei ang. Mizo hnam tih dan(Mizo Customary law) chungchang leh kan Christianna chungchangah pawh a tak tak nih theuh i tum ang u.