India-in 2047-ah ‘drugs-free’ nih hman tumin hma la zel

Tun hnai kum thum chhungin opium leh cannabis chinna hmun football field 89,000 vela lian chu tihchhiatin a awm a, hei hi Union government-in drugs crackdown a kalpui vang a ni.
India chu kum 2047-ah ‘drug-free’ a siam hman tumin Ministry of Home Affairs (MHA) chuan narcotics leh banned substances te chu kum tinin District Superintendent of Police te chu report pe turin a ti a. He mi hmang hian accountability tha zawk a awm thei dawn tiin senior government official chuan a sawi.
Narcotics Control Bureau (NCB) te chuan tun hnai kum thum chhungin poppy chinna 35,592 acres leh cannabis chinna 82,691 acres an tichhe tawh a. Arunachal Pradesh, Assam, Manipur, Jharkhand, Madhya Pradesh, Himahcal Pradesh, Jammu and Akshmir, Gujarat, Maharashtra, Odisha, Tripura leh Telangana te chu heng chinna hmun tihchhiat nasat ber berna hmun a ni.
Manipur Chief Minster N. Biren Singh chuan March 20, 2022 atanga April 20, 2023 thleng khan an State ah poppy chinna 4305.1 acres an tihchhiat tawh thu a sawi a. He mi kaihhnawihah hian thubuai 110 ziah luh tawh niin mi 40 man an ni tawh a ti bawk a. Manipur chu heng thil chinna hmun tun hnai kum thum chhunga tihchhiatsak tamna ber state a ni.
Manipur chuan dan kalha poppy chingtu tena an chin chhunzawm loh theih nan livelihood scheme dang kalpuiin sum fai pe bawkin heng dan kalh poppy te hi ching lo turin an ti bawk a.
“Ukrul district-a Peh khua a chengte chu an poppy chin tichhe turin Rs 10 lakh pek an ni a. Poppy aiah winter hybrid vegetable seeds pein hei bakah hian pinpeapple chi te, apple leh spice chi te leh sawhthing leh aieng te chu loneitute hnenah hian sem a ni a, he scheme chhawtu hi loneitu 600 an tling” tiin Singh chuan a sawi.
Manipur hi India rama heng drugs hlauhawm tak takte luhna bul ber pakhata ngaih niin Myanmar nena inri mai a nih avangin drugs smuggler te chet nasatna nia sawi a ni bawk a. Hei mai bakah hian Manipur thingtlang hmun tam takah heng poppy te ang chinna tam tak awmin mi tam tak ten eizawn nan bera an hman a ni bawk.
MHA te chuan heng illegal crops te hmun kilkhawr zawka chinte fiah tur hian drone an hmang nasa a, hei bakah hian NCB chuan satellite thlalakte pawh an hmang tangkai hle bawk a.
Tun hnai kum thum chhungin NCB te chuan mi 2,412 man tawh bawkin heng zinga 224 lai chu foreigner an ni bawk a.
Ministry chuan Prevention of Illicit Traffic in Narcotic Drugs and Psychotropic Substances Act (PITNDPS), 1988, heng dan kalha poppy chingte court inrawlhna tel hauh lova kum hnih chhung kawl theihna dan te chu a theh lar hle bawk a.
“Tun hma chuan PITNDPS te hi hman nasat a ni lo va. Tunah erawh States te chu he dan hi hmang uar turin kan ti a ni. Tunah chuan he dan hnuaiah hian mi 500 chuang mana kawlin an awm mek” tiin official te chuan an sawi a. He order hi Central sorkar emaw State sorkar emaw in an kalpui mai theih niin Central sorkar-ah chuan Joint Secretary chinin an kenkawh theih a ni bawk.
NCB te chuan heng illegal drugs te kaihhnawihah ‘dark net’ leh crypto currency te hman uar a nih mek thu sawiin chutiang kaihhnawih chu kum 2020, 2021 leh 2022 khan case 59 lai a awm thu a sawi a. Counter-terrorism portal, Multi Agency Centre (MAC) sub-group te pawhin heng dark net leh crypto currency te narcotics trade kaihhnawiha hman te chhui chiang tur din a ni bawk.
Union Home Minister Amit Shah thurawn angin State tinte chuan Anti-Narcotics Task Forces (ANTF) an din vek tawh bawk a. ANTFs conference hmasa ber chu April 19-20 khan neih a ni tawh bawk a. Chutah chuan Shah chuan heng dan kalha drugs lama che te man an nihin an property leh assets te chhuhsak a pawimawh tiin a sawi.
Kum 2022 khan NCB te chuan financial investigation an hneihah chutiang kaihhnawih case 33 lai siamin property Rs 17 crore hu vel khawih chet theih lohin an siam bawk.
Conference neihnaah Minister chuan drugs man te chu tihchhiat an nih zel loh chuan eirukna emaw thil dik lo tak kalpui theih a ni tia sawiin drugs man te chu mipui hmuh theiha tihchhiat tur a ti bawk a. Sorkar agency te chuan 6.7 lakh kilograms of drugs an tichhe tawh bawk.
Drugs man tin te chu man a nihna leh manna hmun te interactive map NCB tena an kalpui Central anti-narcotics agency tena an hmanah tihlan vek tur a ni bawk a.
Hei bakah hian National Narcotics Coordination portal (NCORD) ah drugs man te chu man a nihna leh a kal zel tumna te sawifiah vek bawk tur niin district level tinah information tha taka siam tur a ni bawk a. Hei bakah hian database dang NIDAAN tih chu awmin chutah chuan thlalak, fingerprint, court order leh Narcotic Drugs and Psychotropic Substances (NDPS) Act hnuaia man leh hremna pek tin te chu dah vek tur niin chu chu State leh Central law enforcement agencies tena an hman theih vek tur a ni bawk.
Officials te chu court judgement zirchiang tura tih ni bawkin eng vanga thiltisuala puhte awlsam zawk taka chhuaha awm nge an nih leh eng tiangin nge conviction rate tihsan a nih ang tih te chu zirchang tura tih an ni bawk a, chumi kaihhnawihah chuan special training te pawh huaihawt a ni bawk a. Central government chuan police-te chu heng drugs te manna kawngah leh hmalak zuina kawngah thuam that zel a tum bawk.