Disaster Management Committee tinung thar turin DC-in chah

Disaster Management Committee
tinung thar turin DC-in chah
Aizawl district bawrhsap chuan an huamchhung veng leh khua zawng zawngte chu Village/ Local Level Disaster Management Committee leh a hnuaia team-te chu tinung thar leh vek turin a ti.
Manipur state buaina thleng mek avanga mahni sahimna zawnga Aizawl district pan mek leh rawn thleng tawh te buaipui dan turah Aizawl district bawrhsap hian hriattirna a tichhuak a. Manipur-a buaina thleng mek avanga mahni sahimna zawnga Aizawl district pan mek leh rawn thleng tawhte an awm avangin, veng/ khaw tina Village/ Local Level Disaster Management Committee leh Committee hnuaia team hrang hrang chu tinung vek turin a ti.
Manipur atanga raltlan chhungte belh tur neilo awm lailawkna turin mahni veng/ khaw chhungah hmunhma lo buatsaih lawk a, chhungte belh tur neite leh neilote pawh chhinchhiah vek turin a ti.
Chutiang mi an awm a nih chuan mahniin emaw VLDMC/LLDMC kaltlangin mobile no 9233942903 ah emaw DEOC toll free no 1077 ah in report tura tih an ni.
VLDMC/LLDMC ten mahni veng/ khuaa raltlan mikhual an neihte format pek chhuah tawh hmangin lut thar an neih apiang nitin chawhnu dar 2.00 hmaa mahni bialtu zonal officer hnenah emaw VLDMC/LLDMC Whatsapp group ah report thin turin bawrhsap hian a ti.
Raltlante zingah belh tur neilo emaw khawtlangin an ngaihtuah theih piahlama harsatna tawk an awm a nih chuan a chunga phone number tarlanah khian in report turin a ti bawk.