IPH Standards inhrilh thar

IPH Standards inhrilh thar
Health & Family Welfare department hnuaia a kaihhnawih thawktute hnenah Indian Public Health Standards (IPHS) 2022-a hriat tur tul chu Thawhlehni khan inhrilh thar a ni.
He hun hmanpuitu Health principal secretary Esther Lalruatkimi chuan department thawktute chu IPHS ang thlapa mahni facility ah theuh hma la turin a fuih a. IPHS norms anga kal tur chuan tehfung pawimawh tak tak chhawpchhuah sak kan ni dawn, tiin, heng tehfung hi min delh rittu maia ngai loa, chonaa ngai tur leh hneh thei tura tan lak chu kan tih makmawk a ni tih a sawi.
IPHS state nodal officer Dr Zorinsangi sawi danin, Mizoram ang tlangramah chuan mihring 3000 awmna zelah Sub Centre pakhat awm tura tih a ni a, heng Sub Centre-ah hian health worker mipa leh hmeichhia pakhat zel awm tura tih a ni. Health & Wellness Centre-a hlankai tawhah Health and Wellness officer pakhat zel an awm a ni.
Primary Health Centre chu mihring 20000 awmna china din tur a ni a, damlo khum pahnih atanga paruk thleng a awm ang. Community Health Centre (CHCs) chu mihring 80000 tal awmna china din tur niin, damlo khum 30 awm tur a ni. Duhthusam chuan medicine specialist, surgeon, Gynae specialist, pediatrician leh anaesthetist pakhat theuh talin an thutchilh tur a ni. Mihring 1000 awmnaah damdawi in khum pakhat zel awm tur a ni a, khum pahnih tal a awm theih chu duhthusam a ni.
District Hospital atan chuan mihring nuai hnih chin awmnaah damdawi in khum 100 a awm tur a ni a, mihring nuai 2-5 inkar awmnaah damdawiin khum 200 a awm tur a ni. Mizoram ah chuan damdawiin khum zat chu awm tha thawkhat mah se, heng damdawi inah hian thawktu- doctor, nurse leh damdawi lam thiam awm tur zat IPHS in a duan ang dah tur zat leh infrastructure tul leh mamawh eng emaw zah a awm ngei ngei tur a ni tih a ni.