Nuggets in final an lut

Zirtawp zing khan NBA conference play-off semi-final game rukna khelh a ni a. Denver Nuggets chuan Phoenix Suns hnehin Western Conference final an lut. Zirtawp zinga inkhel dangah Boston Celtics chuan Philadelphi 76ers an hneh a, deciding game khelh a ngaih phah ve thung.
Semi-final game nga an khelh tawhah 3-2 a hmahruai mek Denver Nuggets hian an khingpui Phoneix Suns lakah bul an tan tha hle a, quarter hmasa berah point 44 zet thawkchhuakin, point 18 zetin chungnung zawkah an tang nghal. Bul an tan that em vangin an phur leh zual a, game sarih khelh kher ngai lo turin final luh chiang nghal an tumruh hle. Quarter hnihnaah pawh an khel tha chhunzawm viau a, point 12 in chungnung zawkah an tang zui leh a. Chawlhlawk a nih meuh chuan point 30 zetin hma an hruai tawh a, an ke khingkhatin final an rap der tawh.
Point 30 zeta hnufual tawh Suns hian inlehthalna lian thlentir beiseiin second half-ah tan an khawh a. Quarter thumnaah point 3 a chungnung zawk niin an inkar an tizim hret a. Quarter linaah point hnihin chungnung zui leh mah se point 25 zetin an khingpuite an umphak lova, Nuggets lakah hian 125-100 a tlawmin, an tla a. Denver Nuggets hian 2020 hnu lama a vawikhat nan conference final an lut. NBA final la lut ve ngai lo Nuggets hian Golden State Warriors leh LA Lakers te inkhela chak zawk zawk Western Conference final-ah an hmachhawn zui leh ang. Semi-final game nga khelh tawhah Lakers hian 3-2 in Warriors lakah hma an hruai mek a. Tukin zing hian game rukna khelh a ni ang.
A vawi li nan Suns an hneh tum hian Nuggets player pawimawh Nikola Jokic chuan point 32 a thawkchhuak. Jokic hian point 32 a thawhchhuah bakah assist vawi 12 a neiin, ball sawhlet vawi 10 zet a dawng tling bawk a, tre-ble double a puitlin. Nuggets tan hian Jamal Murray chuan point 26 a thawkchhuak ve bawk.
Zirtawp zinga Eastern Conference semi-final game rukna khelhah 2-3 hnu fual mek Boston Celtics chuan point 95-86 in Philadelphia 76ers an hneh a, final lut tur zawk a chiang lo zui zel. Semi-final game sarihna hi pathianni zingah khelh a ni ang a. Kum 2001 hnu lama conference la lut miah lo 76ers hi Boston Celtics mualah an leng lut ang.