Haaland-a’n Messi record a khum

On Oct 16, 2026 2 0

Haaland-a’n Messi record a khum
Etihad Stadium-a an mikhual Paris St-Germain lakah 4-2-a an tlawm tumin Manchester City forward Erling Braut Haaland chuan goal hnih a thun. Haaland hian Champions League-ah goal 60 a thun tling chiah a, UCL-a goal 60 thun tling thei naupang ber ni thin Lionel Messi record khumin, record thar a siam.
Haaland hian PSG an hmachhawn tumin Champions League match 60 a khel tling chiah a, goal hnih a thun hmangin goal 60 a thun tling chiah bawk. UCL-ah hian Lionel Messi chuan kum 26 leh ni 86-a upa a nihin goal 60 a thun tling a, UCL-ah goal 60 thun tling thei naupang ber a ni thin. PSG laka goal hnih thun Haaland hi kum 26 leh ni 85-a upa a ni. UCL a goal 60 an thun tlin laiin Messi aiin ni khatin a naupang zawk, Messi record khumin record thar duhawm tak a siam.
Goal thun tura duan Haaland hian player ropui Messi record a khum bakah UCL-ah hnuhma thar duhawm tak a hnutchhiah tel bawk a, UCL-ah game 60 atanga goal thun tam ber a ni. Haaland hian UCL vawi 60 khel tling chiahin goal 60 a thun a, match tinah goal khat thun ziah ang a ni. Footballer ropui tak takte pawhin UCL-ah hian match 60 atangin goal an thun tam thei bik lo. Haaland hnaih bertu Ruud van Nistelrooy chuan match 60 atangin goal 48 chauh a thun. Nistelrooy aia Haaland goal thun tam zawkna hi goal 12 zet a ni.
UCL-ah match 60 atanga goal thun tam zualte dangte chu; Harry Kane – 45, Kylian Mbappé 40, Lionel Messi – 39 leh Robert Lewandowski – 39 te an ni a. UCL a goal thun hnem ber ni mek Cristiano Ronaldo chuan UCL-a a match hmasa 60 atangin goal 23 chauh a thun. Hei hian Haaland goal thun theihzia a tilang chiang hle. Haaland hian goal a thun chho zel a nih chuan Cristiano Ronaldo record pawh a la khum theih ngei a beiseiawm.
Mbappe pawhin Messi a khum
Nilai zan khan Champions League-a Messi record khum zat a ni a, Kylian Mbappe pawhin UCL-a match 100 khel tling thei zinga naupan lamah Messi record a khum ve bawk.
Real Madrid forward Kylian Mbappe hian Roma an hmachhawn tumin UCL-a a match 100-na a khel. Roma an hmachhawn tum hian kum 27 leh ni 298-a upa a ni a. UCL a match 100 khel tling thei naupang ber ni thin Lionel Messi (kum 28 leh ni 84) chu khumin record thar a siam.
France leh Real Madrid tana goal thun thei tak Mbappé hian champions league-ah vawi 100 khelin goal 72 a thun tling a, UCL a goal thun tam lamah panganna niin Real Madrid in ‘Golden Boy’ an tih hial Raúl González record a khum tel bawk.