Champhai district-ah ASF leng vawk 200 chuangin tawrh phah

Champhai district-ah ASF leng
vawk 200 chuangin tawrh phah
Champhai district khaw pahnih velah vawk natna hri African Swine Fever a leng leh mek a, hmun danga a darh zel lohna atana sawrkarin hma a laknaah vawk 200 chuangin an tawrh phah tawh.
Thudawn danin, African Swine Fever (ASF) hri vang hian Champhai district Ngur khuaah vawk 69 a thi tawh a, hri a darh zel lohna atan AH & Vety department hriatpuiin vawk 73 suat/ tihlum an ni tawh. Champhai Zote ah hri vang hian vawk 12 an thi tawh a, a darh zel tur venna atan vawk 63 dang an tihlum tawh bawk. Heti hian ASF vanga vawk thi leh a darh zel lohna atana a hri lenna hmuna vawk suat hi 217 a tling tawh a ni.
Sawrkar chuan ASF lenna khua atang hian vawk leh vawsa lam lakchhuah a khap a ni.
AH & Vety deputy director Dr C Lalzuitluanga chuan The Aizawl Post zawhna chhangin, ASF hi kumin May 6 khan Ngur khuaah hmuhchhuah a ni a. Vawk thite chu inkaihhruaina dan awmsa angin chinai leh damdawi hmang a phum nghal zel an ni. Department-in Ngur khuaah vawk damlo a awm tih an hriat rualin a hmunah an kalchilh nghal a, an damloh chhante enfiah niin, vawk thi tawh sawngbawl dan tur khawtlang mipui hnenah an zirtir nghal a ni.
ASF vaccine a la awm loh a vangin inven dan tha ber chu fimkhur a ni tih Dr C Lalzuitluanga hian a sawi a. A hri hmundanga a darh zel loh na’n a lenna huamchhunga vawk la damte chu tihhlum zel a ni a; vawkchaw leh thildang hmanrua leh thuamhnaw hmangtea a darh awl em avangin fimkhur turin mipui an ngen tih a sawi.